Sámediggeráđđi boahtá Girkonjárgii áŋgiruššanlisttuin Mátta-Várjjagis:

• Sámedikki dievasčoahkkin lea čakčat mearridan ođđa Saviomusea konseaptaválljema
• Äʹvv nuortalaš musea nannen 1 miljon ruvnnuin
• Heivehuvvon sámi hálddašanguovlu Mátta-Várjjaga gielladillái
• Ođđa ovttasbargošiehtadus gieldda ja Sámedikki gaskka
• Stipeanda sidjiide geat studerejit nuortalašgiela

Dasa lassin bargá sámediggeráđđi dan ovdii ahte sámegiela álgokurssat maid Sámi allaskuvla lágida Mátta-Várjjaga gielddas galget nannejuvvot.

Dál háliida Sámediggi beassat johtui sámi giellaguovddáža ásahemiin Mátta-Várjjagii ja áigumuš lea ahte dakkár bargu álggahuvvo jagis 2025.

– Sámediggeráđi mihttomearri lea ahte buohkat geat háliidit oahppat sámegiela, galget oažžut vejolašvuođa dan dahkat. Danne mii oaidnit dárbbu sámi giellaguovddážii Mátta-Várjjagis. Seammás áiggun bovdet Mátta-Várjjaga gieldda mielde sámegielaid hálddašanguvlui, dál go mii leat heivehan ortnega Mátta-Várjjaga gielladillái, dadjá Mikkelsen.

Sámediggi ja Mátta-Várjjaga gielda bovdejit álbmotčoahkkimii duorastaga golggotmánu 24. b. dii. 18.00-20.00 Girkonjárgga ráđđeviesus ovttasbargošiehtadusa birra gaskal Sámedikki ja Mátta-Várjjaga gieldda. Doppe sáhttet olbmot buktit cealkámušaid ovttasbargošiehtadussii.