Maren Benedicte Nystad Storslett Ørjan Marakatt Bertelsen

– Lea buorre go Sámediggi lea ožžon gokčojuvvot haddegoargŋuma ráđđehusa evttohusas, ja ahte leat lasihan ruđa go Sálat suohkan šaddá oassin sámegielaid hálddašanguovllus. Dat lea buorre álgu. Muhto sámi servodagas leat stuora dárbbut mat eai leat vuoruhuvvon bušeahtas, dadjá Maren Benedicte Nystad Storslett (NSR) geas lea bušeahttaovddasvástádus sámediggeráđis.

Sámediggeráđđi bovde dál Stuoradikki bellodagaid ovttasbargui nannet vuoruhemiid sámi áššiide.

– Sihke Sámediggi ja servodat lea dál proseassas čuovvolit Duohtavuođa- ja soabahankommišuvnna raportta. Stuoradiggi lea maid sin meannudeamis diibmá bivdán ráđđehusa evttohit doaibmabijuid 2026 bušeahtas mat galget nannet sámi kulturealáhusaid ja ásahusaid, dadjá Nystad Storslett.

Sámediggeráđđi oaivvilda ahte ráđđehusa evttohus ii raba vejolašvuođa albma ládje čuovvolit seanadanbarggu. Sámediggi lea earret eará ovddidan dárbbu nannet sámi ásahusaid, sihkkarastit sámi ealáhusaide ovdánahttinvejolašvuođaid ja ásahit sierra sámi giellaáittardeaddji. Sámedikkis leat maid olu ođđa áššesuorggit maid galggašii dustet, nugo KI ovdáneapmi, sihkarvuohta ja gearggusvuohta ja johtolat.

– Mis lea dárbu nannet sámegielaid ja kultuvrra, ja leat olu ođđa áššesuorggit maid mii dál fertet vuoruhit, nugo sihkarvuohta ja teknologiija ovdáneapmi. Jus Sámediggi galgá dustet otná hástalusaid ja čuovvolit min geatnegasvuođaid sámi álbmoga ektui, de gáibiduvvo ahte mis leat resurssat dasa, dadjá Nystad Storslett, geas lea doaivva ahte sáhttet ásahit buori gulahallama joavkkuiguin Stuoradikkis.

– Mii bovdet Stuoradikki bellodagaid ovttasbargui dál loktet sámi servodaga dárbbuid.