Boazodoallokonferánsa lágiduvvo Guovdageainnus geassemánu 11.beaivvis gitta 12. beaivái 2025, lunššas lunšii. Konferánsa lágiduvvo Sámiráđi Lávdan Sámi Arena oktavuođas. Guovddážis dán jagi Boazodoallokonferánssas leat rievdadusat boazodoallolágas ja eanajuohkinlágas, konsultašuvnnat, dearvvašvuohta, váikkuhusčielggadeamit, heiveheamit dálkkádatrievdamiidda ja gulahallan ja mediahálddašeapmi.
Ulbmil konferánssain lea loktet máhtu diehtojuohkima ja vásáhuslonohallama bokte, ja maiddái ulbmil fierpmádathuksemis. Boazodoallokonferánsa galgá leat buorre deaivvadanbáiki boazodollui gos áigeguovdilis fáttát ságastallojuvvojit ja doaivumis addá inspirašuvnna ja reaidduid viidáset bargguide boazodilis.
Lea nuppes ahte Sámediggi lágida Boazodoallokonferánssa. Diimmá konferánsa lei vuosttaš konferánsa, ja oasseváldit ledje hui duhtavaččat konferánssain.
– Lea deaŧalaš ahte boazodoallu beassá deaivvadit juohkin dihte máhtu ja vásáhusaid eará boazodolliiguin, ja midjiide Sámedikkis ja eará guoskevaš aktevrrain. Oassálastit ohppet eanet relevánta fáttáid birra. Konferánssa bokte oažžut mii vejolašvuođa oahppat guhtet guoimmisteamet, ja dása illudan. Mihttomearri lea ahte Boazodoallokonferánsa šaddá jahkásaš lágideapmin, dadjá sámediggepresideanta Silje Karine Muotka (NSR).
Sámediggi lea bovden ovtta oasseváldi juohke siiddas/orohagas. Sámediggi lea maiddái bovden eará sámi aktevrraid geat barget boazodoalloáššiiguin.
Logaldalliid searvvis leat NBR-jođiheaddji Inge Even Danielsen, Eirik Larsen Sámiráđis, boazodoalli Ellinor Guttorm Utsi, Anders Blom Protect Sápmi:s, Kjell Erik Saure gii boahtá Snakk med Saure-fitnodagas, Svein Eilertsen NIBIO:s, Elina Hakala Sámedikki hálddahusas, Camilla Risvoll og Solveig Øye Bjørdal Nordlandsforskninga:s, Ingebjørg H. Nymo Reinhelsetjenesten:s ja Heidi Rautiainen Sveriges Lantbruksuniversitet:s.
Dát lea siskkáldas deaivvadeapmi boazoealáhussii, ja lea dušše bovdejuvvon oasseváldiide. Dieđihanáigemearri lea miessemánu 27. beaivvi. Mediat sáhttet searvat konferánsii.
Konferánssa birra:
Lávdan Sámi Arena: Boazodoallokonferánsa – boazoealáhusa siskkáldas suorgedeaivvadeapmi.
Prográmma:
Boazodoallokonferánssa prográmma.