Áigemearri buktit čálalaš cealkámušaid guhkiduvvo ođđajagimánu 31. beaivái 2026.

– Go luossamáddodagat unnot, de unnu maiddái luossabivdu, ja dehálaš sámi kulturárbi sáhttá jávkat. Mii háliidit dál oažžut cealkámušaid das maid mii sáhttit dahkat sihkkarastin dihte ahte eamiálbmotmáhttu luossabivddu birra sáhttá viidásetfievrriduvvot boahttevaš buolvvaide. Mii leat juo ožžon ollu cealkámušaid, ja mun illudan gullat vel eanet buriid cealkámušaid go mii boahtit Finnmárkui ođđajagimánus, dadjá stáhtačálli Kristoffer André Hansen.

Mii háliidit árvalusaid iešguđet guovlluin gos lea leamaš ja lea ain sámi luossabivdokultuvra. Danne lágideimmet guokte gulaskuddandilálašvuođa Romssas ja Nordlánddas skábmamánus, ja dál lea Finnmárkku vuorru. Čoahkkimiid ulbmil lea čohkket árvalusaid Sámedikki ja Dálkkádat- ja birasdepartemeantta oktasaš plánii sámi luossabivdokultuvrra seailluheami birra, mii dál lea gulaskuddamis.

– Mii leat juo ožžon ollu miellagiddevaš ja buriid cealkámušaid. Seammás lea dát fáddá mii guoská oallugiidda, ja min mielas lea deaŧalaš oažžut sisa nu ollu oainnuid go vejolaš ovdal go plána viidáset bargu manná konkrehta dássái, dadjá sámediggeráđđi Jon Christer Mudenia.

Gulaskuddama duogážin lea luossamáddodaga duođalaš dilli, ja dat stuora váikkuhusaid maid dat mielddisbuktá sámi kultuvrra doaimmaheapmái, gilli, árbedieđuide ja ealáhusvuđđui. 

Dieđut álbmotčoahkkimiid birra 

Njávdán/Njauddâm: Mánnodaga ođđajagimánu 12. beaivvi dii. 18.00-20.00, Äʹvv Saa'mi muʹzei 

Leavdnja: Disdaga ođđajagimánu 13. beaivvi dii. 18.00-20.00, Fjordutsikten Camping

Dálkkádat- ja birasdepartemeantta stáhtačálli Kristoffer André Hansen ja sámediggeráđđi Jon Christer Mudenia áiguba muitalit plána barggu birra, ja čohkket cealkámušaid viidáset prosessii.

Fállat snoahpamuša. Čoahkkimat leat rabas buohkaide. Ii dárbbaš dieđihit. 

Sádde áinnas čálalaš cealkámušaid jus it sáhte boahtit gulaskuddančoahkkimiidda.

Loga eanet gulaskuddama birra