Sámediggi bovde fidno- ja oahppomeassuide goalmmát jagi joatkkaskuvlaohppiid geain lea sámegiella fágan, ja sámi nuoraid gaskal 18 ja 25 jagi geat eai leat joatkkaskuvlaoahpus.

Meassuid ulbmilin lea čalmmustahttit makkár vejolašvuođat gávdnojit válljedettiin sámegieloahpu dahje sámegiela oassin iežas oahpus, ja makkár fidnuide dat sáhttá doalvut du. Danne bovde Sámediggi maiddái meassuide oahppoásahusaid ja sámi fitnodagaid mat dárbbašit sámi giella- ja kulturgelbbolašvuođa.

– Olu fidnosurggiin lea dárbu sámegielat olbmuide. Danne áigut mii loktet ovdan daid olu vejolašvuođaid mat rahpasit jus dus lea sámi giella ja kulturgelbbolašvuohta. Barggažatgo skuvllain, gielain, kultuvrrain, mátkeealáhusain dahje earáin, de leat deaŧalaš rollamodealla, dadjá sámediggeráđđi Maren Benedicte Nystad Storslett (NSR).

Fidno- ja oahppomeassut lágiduvvojit Guovdageainnus guovtti beaivvi badjel, golggotmánu 27.-28. beivviid 2025, lunššas lunšii. Oassálastin lea nuvttá, ja Sámediggi máksá mátkki ja orruma ohppiide geat servet.

Vuosttaš beaivvi leat oahppoásahusaid ovdanbuktimat, sosiála doaimmat, mállásat ja guoimmuheapmi. Nuppi beaivvi lea fágalaš prográmma mas leat fitnodatovdanbuktimat ja standat.

– Mii ávžžuhit sámi nuoraid, oahppobagadalliid, oahppoásahusaid ja fitnodagaid searvat. Dát lea buorre vejolašvuohta oažžut ja addit čuvgejumi oahppoválljemiid ja boahttevaš karriearavejolašvuođaid birra, dadjá Nystad Storslett.

Dieđiheapmi lea dál rabas, ja dieđihanáigemearri lea golggotmánu 14. beaivvi.

Sámi fitnodagat ja oahppoásahusat mat háliidit searvat sáhttet váldit oktavuođa Sámedikkiin.

Loga eanet fidno- ja oahppomeassuid birra ja dieđit iežat searvama