Rievdadanárvalusat mielddisbuktet ahte galgá dahkkot bajitdási čielggadeapmi areálageavaheamis plána- ja huksenlága mielde guovloregulerema bokte, ovdal go addo konsešuvdna. Konsešuvdnameannudeapmi viidásetfievrreduvvo buot ovdamuniid ja heađuštusaid ollislaš servodatekonomalaš vihkkedallamin prošeavttas.

Sámediggeráđđi Maja Kristine Jåma (NSR) registrere ahte láhkarievdadanárvalusain lea stuora fokus dasa ahte beavttálmahttit proseassaid go ásaha bieggafápmorusttega, vai deivet huksejeddjiid gáibádusaid jođáneappot proseassaide ja ráđđehusa sávaldaga jođáneappot oažžut sadjái eanet ođasmuvvi fámu.

– Mun oaivvildan ahte gulaskuddannotáhta ja láhkarievdadanárvalusat ain leat váilevaččat čilgehusas movt dan evttohuvvon láhkarievdadusat váikkuhit nannet einnostahttivuođa ja sámi vuoigatvuođaguddiid olmmošvuoigatvuođalaš suddjema go deaivvadit bieggafápmoindustriijain. Dáhttu jođáneappot hukset bieggafámu ii sáhte man ge dilálašvuođa dihte dagahit ahte njeidet sápmelaččaid olmmošvuoigatvuođaid álgoálbmogin, dadjá Jåma.

Sámediggeráđđi moaitá daid árvaluvvon rievdadusaid vuostecealkámušaid ja bieggafápmorusttegiid guovloregulerenplánaid váidagiid váiddameannudeamis. Departemeanttat árvalit ahte bieggafápmorusttegiid guovloregulerema mearrádusaid váidagat sirdojuvvojit Stáhtahálddašeaddjis Gielda- ja guovlodepartementii. Sámediggeráđđi oaivvilda ahte Stáhtahálddašeddjiin regionála dásis lea olu lagat diehtu sámi dilálašvuođaid ja boazodoalu birra go mii departemeanttas lea.

– Lean maid kritihkalaš dasa ahte ii čielggaduvvo leago sámi vuoigatvuođaguddiin ja Sámedikkis vejolašvuohta konsultašuvnnaide váiddagieđahallama oktavuođas Gielda- ja guovlodepartemeanttas. Sámediggeráđđi ii sáhte doarjut ortnega mas departemeanta ii dárbbaš konsulteret sámi beroštumiid ja vuoigatvuođaguddiid geaidda dát njuolga guoská ja Sámedikki ovdal mearrádus dahkko vejolaš moaitagiin ja vuostecealkámušain guovloreguleremiin bieggafápmui, dadjá Jåma.

Sámediggeráđđi maid váillaha čielggadeami oktavuođas gaskal plánamearrádusaid mat leat plána- ja huksenlága mielde ja eavttuin ja váidudeaddji doaimmain mat leat energiijalága mielde.

– Jus Sámediggi dahje sámi beroštumit ja vuoigatvuođaguoddit geaidda ášši njuolga guoská galget sáhttit addit iežaset friddja ja ovdagihtii dieđihuvvon miehtama plánaide dahje doaimmaide, de leat vejolaš váidudeaddji doaimmat oassin árvvoštallamis. Nu go Sámediggi lohká dán, de mearkkaša guovloreguleren mearrádus duohtavuođas dan ahte áigot maiddái addit konsešuvnna. Jus sámi bealit eai beasa árvvoštallat vejolaš eavttuid ja váidudeaddji doaimmaid go árvvoštallet guovloregulerema váikkuhusaid, de ii leat ollislaš vuođđu miehtat dahje hilgut, dadjá Jåma.

Sámediggi bivdá konsultašuvnnaid energiijalága ja plána- ja huksenlága rievdadusaide Gielda- ja guovlodepartemeanttain ja Oljo- ja energiijadepartemeanttain. Áigemearri buktit mearkkašumiid láhkarievdadanárvalussii lea guovvamánu 27. beaivvi. 

Loga gulaskuddancealkámuša (dušše dárogillii): Sametingets uttalelse til forslag til endringer i energiloven og plan- og bygningsloven knyttet til vindkraft på land (PDF, 206 kB)

Loga eanet gulaskuddama birra ráđđehusa neahttasiiddus

Sámediggeráđđi Maja Kristine Jåma (NSR) addá jearahallama ja vástida gažaldagaide, mob. +47 472 42 366, maja.kristine.jama@samediggi.no