Odne ovdanbuvttii ráđđehus 37 miljovnna ruvdnosaš sámi páhka mii galgá nannet sámi oahpaheaddjeoahpu. Dan dagai máhttoministtar Tonje Brenna go finai Gorravári skuvllas guossis.
Loga maid: 37 miljovnna ruvnno sámi ohppui (NRK Sápmi)
– Go sámegiela oahpahusas lea 60 proseantta heaitin, de diehttelasat buot ávkkuha, dadjá sámediggeráđđi Mikkel Eskil Mikkelsen (NSR).
Sámediggi vuoruha sámegieloahpaheddjiid
Sámediggi ja ráđđehus leat 2022:s ja 2023:s bargan sierra stuoradiggedieđáhusain sámegieloahpahusa birra.
–Stuoradiggedieđáhusas leat doaibmabijut mánáidgárddiid, skuvllaid ja alitoahpu váste mat galget fuolahit ahte oažžut eambbo sámegieloahpaheddjiid. Sámediggi lea áibbas čielgasit vuoruhan bargat oahpaheddjiid rekrutteremiin ja gáiddusoahpahusa rámmaid buoridemiin, dadjá Mikkelsen.
Sámedikki listu ráđđehussii
Sámedikkis lei ráđđehussii viiddis listu das movt sámegieloahpahusa sáhttá nannet, ja movt sámegieloahpaheddjiid sáhttá rekrutteret. Listtus earret eará lea sámi giellaáittardeaddji ásaheapmi, sámi oahpponeavvuid sihkkarastin, gáiddusoahpahusguovddážiid ásaheapmi, mánáidgárdelága rievdadeapmi, ortnegat mat sihkkarastet sámegieloahpaheddjiide bálkká go leat váldime oahpu, ja eambbo sámi oahppofálaldagat.
– Dát listu čájeha ahte maŋimuš jagiid leat hui unnán vuoruhan sámegieloahpahusa, ja ahte leat stuora dárbbut. Dain dieđuin mat odne leat boahtán ovdan, ledjen háliidit oaidnit eambbo doaibmabijuid, muhto sámegiela gáiddusoahpahusa nannen lea riekta ja dehálaš, dadjá Mikkelsen.
Ovttaoaivilvuohta ja guovtteoaivilvuohta
Lea leamaš ollu guovtteoaivilvuohta Sámedikki ja Ráđđehusa ovttasbarggus. Sámediggi botkii konsultašuvnnaid ođđa oahpahuslága birra go sámi mánát eai ožžon iežaset vuoigatvuođaid nannejuvvot. Goitge šattai ovttaoaivilvuohta stuoradiggedieđáhusa ja doaibmabijuid birra mat das dieđihuvvojedje.
– Go šattaimet botket konsultašuvnnaid oahpahuslága birra, de lassánedje vuordámušat stuoradiggedieđáhusa doaibmabijuid čuovvuleapmái. Lea buorre álgu go oažžut otná páhka. Duohtavuođa- ja soabadankommišuvnna raportta čuovvuleapmi šaddá dehálaš boahtte lávki ja mun illudan bargagoahtit dáinna ovttas ráđđehusain, dadjá sámediggeráđđi.