Sámedikki dievasčoahkkin gieđahalai ášši loddema birra 2020:s. Dievasčoahkkin lei čielggas ahte eamiálbmot- ja olmmošvuoigatvuođat nannosit suddjejit sámi vieruid.

Sámediggi dohkkeha dan, ahte bivdduid lea dárbu muddet, muhto oaivvilda ahte giđđaloddema dálá reguleren gaskaboddosaš láhkaásahusas áigodagas 2013-2022 ii vuhtiiváldde giđđaloddema sámi vierrun. Dálá reguleren addá lobi bivdit oktiibuot 150 čáhcelotti, ja bivdu lea ráddjejuvvon sihke geográfalaččat ja áiggi dáfus.

– Sámedikki dievasčoahkkin lei čielggas das, ahte dálá reguleren rihkku sámi vieruiduvvan vuoigatvuođaid, ja eamiálbmot- ja olmmošvuoigatvuođaid. Danin sámediggeráđđi atná dehálažžan deaivvadit Dálkkádat- ja birasdepartemeantta politihkalaš jođihangottiin, oažžun dihtii áddejumi das mo Guovdageainnu sámit vásihit dili. Dilli lea dohkketmeahttun ja berre buoriduvvot farggamusat, dadjá sámediggeráđđi Maja Kristine Jåma.

Sihke Jåma ja stáhtačálli Aleksander Øren Heen oassálastiba álbmotčoahkkimii loddema birra eahkes golggotmánu 18. b. Báktehárjji valáštallanhállas, Guovdageainnus. Álbmotčoahkkimis ovdanbuktojuvvojit guokte áigeguovdilis raportta loddema birra. Dasa lassin addojuvvo áigi báikkálaš olbmuide ovdanbuktit oainnuideaset.

– Illudan sakka gullat mo Guovdageainnus vásihit dili. Anán dehálažžan dan, ahte sii geaidda ášši váikkuha, besset ovdanbuktit oainnuideaset ovdalgo boahtteáigge bivdoláhkaásahus mearriduvvo. Sávan ahte ollugat servet álbmotčoahkkimii, dadjá Jåma.

Gažaldagaid dahje jearahallama oktavuođas, váldde oktavuođa sámediggeráđiin Maja Kristine Jåmain (NSR), mob. +47 472 42 366, maja.kristine.jama@samediggi.no

Eanet dieđut čoahkkima birra

Loga maiddái: Ášši 10/21 Giđđalodden Guovdageainnu suohkanis