Sámedikki dievasčoahkkinjođihangoddi hálddaša Sámedikki válgajienastuslogu, ja lea dál ovddidan sierra ášši man Sámedikki dievasčoahkkin galgá meannudit boahtte vahku. Evttohusas dievasčoahkkinjođihangoddi evttoha doaibmabijuid nannen dihte sámi álbmoga máhtolašvuođa válgajienastuslogu eavttuid ja hálddašeami birra.
– Lea dehálaš ahte sámi álbmot, ja earenoamážit nuorra sápmelaččat geat fargga besset jienastit, dovdet Sámedikki válgajienastuslogu eavttuid ja dihtet mot dieđiha iežas jienastuslohkui, dadjá Sámedikki dievasčoahkkinjođiheaddji Tom Sottinen (Bb).
Dievasčoahkkima mearrádusa vuođul áigu dievasčoahkkinjođihangoddi bidjat johtui iešguđetlágan doaibmabijuid nannen dihte sámi álbmoga máhtolašvuođa jienastuslogu birra. Sámedikki dievasčoahkkinjođihangoddi evttoha máŋga diehtojuohkindoaibmabiju, earret eará nannet diehtojuohkima sámi joatkkaskuvlaohppiide dakko bokte ahte fitnat doppe. Dasa lassin deattuhuvvo ahte Sámedikki dievasčoahkkinjođihangottis lea váldi iskkademiid čađahit man bokte háhká eanet dieđuid dan birra man olu sii geat jo leat čálihuvvon válgajienastuslohkui dihtet eavttuid birra.
Áššis maid ovdanboahtá ahte Sámedikkis eai leat dievaslaš dieđut dan birra manin muhtimat geat leat čálihuvvon jienastuslohkui bivdet iežaset sihkkojuvvot. Dievasčoahkkinjođiheaddji oaidná vejolažžan háhkat eanet dieđuid dan birra.
– Midjiide livččii hui ávkkálaš diehtit sivaid eretdieđiheapmái, danne árvvoštallat eretdieđihanskovvái lasihit eaktodáhtolaš oasi mas sáhttá čilget siva man dihte ii šat háliit jienastit sámediggeválggain. Min áigumuš lea ahte buot sápmelaččat geat devdet gáibádusaid čálihit iežaset válgajienastuslohkui, geavahivčče iežaset jienastanvuoigatvuođa boahtte válggain, dadjá Sottinen.
Loga áššebáhpiriid áššái 039/24 Nannet Sámedikki jienastuslogu diehtojuohkima