Davvi-Norggas lea erenoamáš kulturárbi mas leat luottat sámi, kveana ja dáža ássamis. Leat boares visttit, duojit ja borramušárbevierut, smávva ja stuora luottat eanadagas maid buohkat geat leat ássan dáppe buolvvaid čađa ovdal min leat guođđán. Davvi-Norgga kulturduovdda lea áidnalunddot, muhto ollu dás lea jávkamin.

Kulturárbi Davvin prošeavtta viidásetfievrrideapmi lea dehálaš áŋgiruššan Davvi-Norgga kulturárbbi ektui. Dat váikkuha dasa ahte Davvi-Norgga kulturárbbi hálddašeapmi oktiiordnejuvvo, nu ahte mii ovttas sáhttit váikkuhit ahte kulturárbi oažžu buoret eavttuid.

– Mii áigut áimmahuššat iežamet vistesuodjalusa seammás go mii láhčit dili eallimii ja doibmii báikegottiin. Mun sávan maiddái ahte dat sáhttá váikkuhit dasa ahte eanebut ožžot eanet máhtu min oktasaš kulturárbbi birra ja ahte eanebut oahpásmuvvet dasa ja háliidit váldit das vára, dadjá sámediggeráđđi Jon-Christer Mudenia (NSR).

Prošeakta galgá:

• Veahkehit ja čuovvolit kulturbirrasiid eaiggádiid.
• Nannet báikkálaš gelbbolašvuođa ja árbevirolaš duoji.
• Hukset fierpmádaga gaskal árbevirolaš duojáriid, boares visttiid eaiggádiid ja hálddašeami.

Prošeavttain háliidit seailluhit dieđuid das mo olbmot leat huksen ja ássan davvin. Dat ii atte dušše ipmárdusa vássán áiggis, muhto maiddái buriid čovdosiid boahtteáigái.

– Ovttas mii sáhttit sihkkarastit ahte kulturárbi oažžu buoret eavttuid ja šaddá resursan báikegottiide. Dát lea áŋgiruššan min historjjá áimmahuššama váras, gelbbolašvuođa huksema várás ja ássanhálu huksema várás. Mii sávvat ahte ollugat servet dán mátkái, dadjá sámediggeráđđi Jon-Christer Mudenia.

Neahttasiiddus  www.kulturarvnord.no gávnnat neavvagiid, inspirašuvnna ja bagadeami. Neahttasiidu lea čoahkkananbáikin buohkaide geat háliidit áimmahuššat kulturárbbi – eaiggádiidda, geavaheddjiide, duojáriidda ja fágaolbmuide.