Materiálas boahtá ovdan earret eará ahte sámediggejienasteaddjiin lea alit oahppodássi ja ahte ollu sámi nuorat vurdet čálihit iežaset Sámedikki jienastuslohkui. Measta 44 proseanta sis geain lea jienastanvuoigatvuohta Sámediggeválggas jagi 2021 leat čađahan alit oahpu. Sámedikki jienastuslogu oahppodássi lea allat go buohkain geat sáhttet jienastit stuoradiggeválggas.

– Sámediggi lea ain nuorra parlameanta, ja mii dárbbašat ođđa máhtu sámediggeválggaid ja válgaoassálastima birra vai sáhttit ovddidit min álgoálbmotparlameantta nu ahte dat buoremus lági mielde ovddasta sámi álbmoga Norggas, dadjá dievasčoahkkinjođiheaddji Tom Sottinen.

SSB statistihkka Sámediggeválggain galgá jagi 2025 rájes šaddat eanet seammaláganin go eará našuvnnalaš válggat. Maŋŋá jagi 2025 válggaid áigu SGD vuosttaš geardde almmuhit loguid sámedikki válgaoassálastimis. Dieđut Sámediggeválgga válgaoassálastima birra eai leat dán rádjái leamaš olamuttos SGDii, muhto čohkkejuvvojit vuosttaš geardde maŋŋá jagi 2025 válgga.

– Lean ilus go SGD dál ráhkada dárkilet statistihka sámediggeválgga birra, lea stuora beroštupmi oažžut eanet dieđuid geat sámi servodagain geavahit jienastanvuoigatvuođa ja geat eai jienas. Mii oaidnit čielgasit dieđuin mat leat almmuhuvvon guovvamánu 6. beaivvi ahte mii fertet olahit nuorra sámi jienasteddjiid dieđuiguin sámediggeválgga birra, buoridan dihtii válgaoassálastima nuoramus jienasteddjiid gaskkas. Dán barggu mii vuoruhit Sámediggeválggaid 2025 oktavuođas, dadjá Tom Sottinen.

Dás oainnát SSB ođđa statistihka sámediggeválgga birra.