Maŋŋá dán jagi mearehis olu ruoššaluosa laskama Norgga rittus, lea luossahálddašeami dieđalaš ráđđi bivdán eanet dieđuid dan birra mo dat guollešládja váikkuha luondduluosa ja ekovuogádagaid. Sámediggi doarju dan, muhto  deattuha ahte lea maiddái dárbbašlaš árvvoštallat váikkuhusaid mat gusket sámi kultuvrii ja álgoálbmogiid vuoigatvuođaide.

Silje Karine Muotka ja/og Sandra Márjá West Åse M. P. Pulk/Sámediggi

– Dat dárbbašuvvo viiddit máhttovuođđu, mii ii guoskka dušše luossabiologiijii, muhto maiddái dan birra mo doaibmabijut ruoššaluosa vuostá leat váikkuhan sámi kulturgeavaheami ávnnaslaš vuđđui, lohká sámediggepresideantta Silje Karine Muotka.

Sámediggi čujuha luondduvalljodatlága § 14, mii geatnegahttá eiseválddiid deattuhit sámi kultuvrra luondduvuođu vuhtiiváldima buot luondduvalljodaga hálddašeamis – maiddái amas šlájaid gieđahallamis nugo ruoššaluosain.

– Hálddašandoaibmabijut main lea stuorra váikkuhus sámi geavahanguovlluide, fertejit árvvoštallot álgoálbmogiid vuoigatvuođaid ektui joatkit kultuvrraset. Stáhtas lea ovddasvástádus sihkkarastit ahte maiddái sámi máhttu ja vásáhusat ožžot saji vuođđogelbbolašvuođas mii biddjo vuođđun hálddašeapmái, dadjá Sandra Márjá West, politihkalaš ráđđeaddi sámediggeráđis.