Davvi-Norgga ja Sámi fitnodagat oidnosis máilmmi stuorámus biebmo- ja mátkeealáhusmeassuin

Iešguđet guovlluid báikkálaš borramušat ja mátkeealáhusat oainnusmahttojuvvojedje Berlinas riikkaidgaskasaš Internationale Grüne Woches (IGW), ja Davvi-Norggas ja Sámis lei nana ovddastus meassuin. Nordlánddas, Romssas, Finnmárkkus ja Svalbárddas serve olles 34 fitnodaga čájehit buktagiiddiset ja juogadit muitalusaid ja vásáhusaid birrasii 400 000 olbmuin geat fitne meassuin.

– Lei nu somá oaidnit go Sámi ja Davvi-Norgga fitnodagat ožžo fuomášumi. Sin buktagat ja fálaldagat leat čađačalmmagat, ja sis leat hui buorit vejolašvuođat ain ovdánahttit fitnodagaideaset, dadjá sámediggeráđđi Elisabeth Erke, gii lea fitnan meassuin.

Sámediggi lea veahkkin ruhtadan Norgga searvama, ja lágidii lávvu-ságastallama mas Davvi-Norgga fitnodagat juogadedje vásáhusaid, ja digaštalle movt Sámi ja Davvi-Norgga buktagiid sáhtášii oažžut hui guovddážii máilmmiviidosaččat.

– Diekkár gávnnadanbáikkit leat áibbas mávssolaččat oktavuođaid huksemii geográfalaš rájiid rastá ja eará ealáhusaiguin, dadjá Erke. – Borramušas ja mátkeealáhusain lea lagas oktavuohta. Historjá mii gullá borramušaide mat guossohuvvojit, ja kultuvra mii čájehuvvo, leat erenoamážat, ja lea deaŧalaš fuolahit ja ovdánahttit dakkár fálaldagaid jierpmálaš vuogi mielde.

Áigumuš buoridit báikkálaš borramušaid ja juhkamušaid gávpejođu

Eanadoallo- ja biebmoministtar Geir Pollestad ovdanbuvttii meassuin ráđđehusa «Oppskrift for mer lokal mat og drikke», man ulbmil lea lasihit báikkálaš borramušaid ja juhkamušaid gávpejođu 25 miljárdda ruvdnui, ovdal jagi 2035.

– Sámi ealáhusat fertejit leat mielde dán ovdáneamis. Olles árvoráiddus, boazodoalu rájes eanandollui, leat stuora vejolašvuođat. Borramuša, kultuvrra ja mátkeealáhusaid oktavuohta lea midjiide gilvalanovdamunnin boahtteáiggis, loahpaha Erke.

Juogadanboalut