Davviriikkaid sámi giellabálkkašumi – Gollegiela 2022 vuoiti

Davviriikkaid sámi giellabálkkašumi – Gollegiela 2022 vuoiti

Davviriikkaid sámi giellabálkkašupmi – Gollegiella 2022 geigejuvvo professor emeritus Ole Henrik Maggai. Son lea iežas eallinagi giellaáŋgiruššama bokte čájehan sámiide ja olgomáilbmái ahte sámegielas lea árvu, ja ahte sámegiella lea ealli giella.

Ole Henrik Magga oažžu davviriikkalaš sámi giellabálkkašumi Gollegiella 2022 Ninni Andersson/Regeringskansliet

Ruoŧŧa lea dán jagi ovddasvástideaddji riika Gollegiella-giellabálkkašumi geigemis, mii geigejuvvo logát gearddi. Bálkkašeapmi geigejuvvo ministariid ja sámediggepresideanttaid čoahkkima olis, Stockholmmas, ođđajagimánu 18. beaivvi 2023.

– Sámegielaid seailluheapmi ja ovddideapmi lea hui dehálaš. Ole Henrik Magga lea guhká leamaš stuora ovdagovva sámi giellageavaheami dáfus ja danin lean hirbmat miháš dainna go otne beassat geiget Gollegiella bálkkašumi Ole Henrik Maggai, dadjá Ruoŧa kulturministtar Parisa Liljestrand.

– Lean hui ilus dainna go beasan Ole Henrik Maggai sávvat lihku Gollegiella-bálkkašumiin 2022. Olles su eallinagi bargu lea vuosehan ahte son ánssáša sihke rámi ja bálkkašumi, dadjá Ruoŧa Sámedikki stivrrajođiheaddji Håkan Jonsson.

Ole Henrik Magga lea riegádan 1947, Guovdageainnus, Davvi-Norggas. Iežas bargguid bokte lea son jahkelogiid bargan gielaid ovdáneami ovddas, earet iežá akademalaš oahpu ja dutkama olis, ja maiddái oahpponeavvuid ovddideami ja oahpaheami bokte.

Magga lea ráhkadan dálá davvisámegiela čállinvuogi, čállán lullisámi grammatihka ovttas Lajla Mattsson Maggain ja searvan sihke ubmi- ja bihtánsámegielaid čállinvugiid ovdánahttinbargguide.

Magga lea maiddái leamaš oassálaš eamiálbmotásahusaid ceggemis, sihke riikkadásis ja riikkaidgaskasaš dásis, ovdamearkka dihte ON bistevaš eamiálbmotforuma vuosttas presideantan, ja Norgga beale sámedikki ásaheamis, mas Ole Henrik Magga lei vuosttas presideanta.

Gollegiella bálkkašupmi ásahuvvui movttiidan dihte sámegielaid ovdánahttima ja ealáskahttima. Bálkkašupmi geigejuvvo juohke nuppát jagi.

Loga eanet bálkkašumi ja ovddit vuitiid birra

Gollegiella 2022 Ninni Andersson/Regeringskansliet