Báikenammalága láhkaásahusas (Forskrift om stadnamn) § 15 čuožžu ahte Sámediggi sáhttá mearridit lassinjuolggadusaid (dievasmahtti njuolggadusaid) sámegiel báikenamaid čállimis:

Språkrådet kan fastsetje utfyllande språkreglar om korleis norske og kvenske stadnamn skal skrivast. Språkreglane skal godkjennast av Kulturdepartementet. Sametinget kan fastsetje utfyllande språkreglar om skrivemåten av samiske stadnamn.

Sámedikki nammanevvohat lea gulahallan Kultur- ja dásseárvodepartemeanttain das, ahte leago departemeanta mii loahpalaččat galgá dohkkehit liigenjuolggadusaid mat gusket sámegiel báikenamaide. Departemeanta lea reivves borgemánu 21.b 2023 vástidan dan, ahte go lea sáhka sámegiel namain, de lea Sámediggi mii loahpalaččat mearrida njuolggadusaid.

Njuolggadusaid ulbmilin lea sihkkarastit ahte davvisámegiela báikenamaid normeren čuovvu gielalaččat seammalágan prinsihpaid, ja lassinjuolggadusaid ulbmilin lea konkretiseret láhkaásahusa gáibádusaid ja heivehanvejolašvuođaid. Báikenammanevvohat sáddii dokumeantta gulaskuddamii geassemánus 2022 buot Norgga beale Davvi-Sámi guovllu suohkaniidda, giellaguovddážiidda ja allaskuvllaide/universitehtaide.

- Dat eai boahtán nu galle gulaskuddanvástádusa, muhto dat vástádusat maid oaččuimet leat leamaš ávkkálaččat ráhkadit njuolggadusaid davvisámi báikenamaid normerema váste. Mii leat čohkken njuolggadusaid dokumenttii «Lassinjuolggadusat davvisámegiel báikenamaid čállimii». Dát lea dokumeanta mii sáhttá leat buorre veahkkin sidjiide geat čohkkejit báikenamaid ja barget daid normeremiin. Sámedikki báikenammanevvohat čuovvu dáid dievasmahtti njuolggadusaid go buktet evttohusaid báikenamaide, dadjá sámediggeráđđi Mikkel Eskil Mikkelsen (NSR).

Lassinjuolggadusat davvisámegiel báikenamaid čállimii (PDF, 444 kB)