Sámediggi ja Ráđđehus barget dál Stuoradiggedieđáhusain sámi giela, kultuvrra ja servodateallima birra 2024:s, man fáddán lea álbmotdearvvašvuohta ja eallineavttut. Dieđáhus galgá biddjot ovdan 2024 giđa ja dan oktavuođas ávžžuha sámediggeráđđi buohkaid sáddet cealkámušaid ráđđehussii fáttá birra.

– Lea deaŧalaš ahte sámi servodat buktá cealkámušaid dieđáhussii vai buot fáttát mat váikkuhit buori dearvvašvuhtii ja eallineavttuide sámi álbmogis čuvgejuvvojit, dadjá sámediggeráđđi Runar Myrnes Balto (NSR).

Álbmotdearvvašvuohta ja eallineavttut lea viiddis fáddá ja danne oaivvilda sámediggeráđđi ahte lea deaŧalaš oažžut ovdan sihke hástalusaid, resurssaid ja vejolaš doaibmabijuid álbmotdearvvašvuođa ja eallineavttuid siskkobealde. Dat sáhttet earret eará leat doaibmabijut ovddidan dihtii buori psyhkalaš dearvvašvuođa ja eallinkvalitehta, buriid eallindábiid ja nannejuvvon dearvvašvuođagelbbolašvuođa.

Erenoamážit háliidit cealkámušaid daid birra:

• Mat leat sámi guovlluin earenoamáš álbmotdearvvašvuođa- ja eallindillehástalusat?
• Makkár buriid beliid sámi kultuvrras ja servodateallimis sáhttá nannet, mat dagahit buori dearvvašvuođa?
• Man bures heive dat obbalaš álbmotdearvvašvuođapolitihkka ovddidit dearvvašvuođa sámi álbmogis, ja makkár heiveheamit dárbbašuvvojit?
• Maid sáhttá ráđđehus dahkat vai buorida álbmotdearvvašvuođa ja eallindili sámi guovlluin?

Cealkámušaid galgá buktit Ráđđehusa neahttabáikkis, ovdal golggotmánu 15. beaivvi 2023.

– Buot árvalusat geavahuvvojit máhttovuođđun stuoradiggedieđáhussii. Sámi álbmot dovdá buoremusat hástalusaid mat čatnasit álbmotdearvvašvuhtii ja eallineavttuide, danne lea sin jietna hui mávssolaš, dadjá sámediggeráđđi.