Hans Ole Eira Åse M. P. Pulk, Sámediggi

– Mii vuoruheimmet deattuhit hástalusaid maiguin ealáhus lea rahčan maŋemus dálvviid, ja danne lea 20 miljovnna ruvdnosaš lasáhus deaŧalaš. Mis lei rievtti mielde mihttomearrin oažžut vel eambbo lasáhusa, dadjá sámediggeráđđi Hans Ole Eira (Gb).

Dievasčoahkkin meannudii Sámedikki cealkámuša boazodoallošiehtadussii 2022 juovlamánus, ja Stáhta ja Norgga Boazosápmelaččaid Riikkasearvi sohpe Boazodoallošiehtadusa guovvamánu 15. beaivvi.

–  2022 goavvedálvi dagahii váttes doaibmadili ja stuora lassi goluid boazodollui. Mii evttoheimmet ásahit spesifihkka buhtadusortnegiid boazodollui guohtunroasu dihte, ja boaldámuša ja doallobiergasiid divruma váikkuhusaid dihte. Eat ožžon miehtama dasa, eat ge dasa go evttoheimmet bisuhit njiŋŋelasnjuovvandoarjaga. Lihkká lea movttiidahtti oaidnit ahte gollovuolidan- ja njuolggodoarjagat leat lassánan, ja ahte gearggusvuođafoanda lea nannejuvvon, dadjá Eira.

Sámediggi lea maid duhtavaš go dutkanprošeakta gonagasgoaskimiid birra galgá almmuhuvvot ja go ruhtadanministtar lea dieđihan ahte ráđđehus áigu ovddidit evttohusa divvatgeahpedemiid birra guovttejuvllat mohtorvuojániin mat adnojit boazodoalus. Dát leat áššit maid Sámediggi máŋgga oktavuođas lea ovddidan ráđđehussii, ja gonagasgoaskinprošeavtta čuovvoleapmi lea maid okta Sámedikki cealkámušain boazodoallošiehtadussii.

– Sámediggi lea duhtavaš go ráđđehus lea mearridan ahte Eanandoallo- ja biebmodepartemeanta dál álggaha dábálaš láhkabargoproseassa mas ollislaččat geahčadit boazodoallolága ja ahte Sámedikki ja Norgga Boazosápmelaččaid láhkalávdegotti bargu lea áhpun proseassas, dadjá Eira.

Sámediggi lea máŋgga oktavuođas dovddahan vuorjašumi dálkkádatrievdamiid váikkuhusain boazodollui.

– Lea buorre go álggahuvvo bargojoavku mii geahččá vejolaš doaibmabijuid ja gaskaomiid boazodoalu dálkkádatheivehallamii, ja čielggada dárbbuid ođđa ja ođasmahtton dieđuide, dadjá Eira.

Jus leat jearaldagat dahje dáhtut jearahallama, váldde oktavuođa sámediggeráđiin Hans Ole Eira (Gb), tlf. +47 918 61 471, hans.ole.eira@samediggi.no