Demokratiijalávdegotti jođiha Finn Arne Bieski-Selfors ja eará lahtut leat Helga Pedersen, Martin Rimpi, Kristin Strømsnes ja Torvald Falch. Dánil Røkke

Sámedikki dievasčoahkkin ásahii njukčamánus 2026 Njuovččageahči demokratiijalávdegotti, mii galgá čielggadit fápmostruktuvrraid ja beliid mat váikkuhit Sámedikki ja sámi servodagaid oassálastima demokráhtalaš proseassain.

Sámedikki demokratiijalávdegottis Njuovččageažis lea lávdegoddečoahkkin Vuonnabađas geassemánu 22. beaivvi ja dan oktavuođas bovdejuvvo lávdegotti vuosttaš rabas čoahkkimii mii guoská lávdegotti bargui.

Čoahkkin lea Várjjat Sámi Museas vuossárgga geassemánu 22. beaivvi dii. 17.00-19.00. Doppe galgá earret eará Unjárgga sátnejođiheaddji Berit Ranveig Nilssen doallat sáhkavuoru.

Lávdegoddi háliida oažžut cealkámušaid ja gullat vásáhusaid das movt bargat sámi áššiiguin báikkálašdemokráhtalaš perspektiivvas.

Lávdegoddi galgá geahčadit beliid mat váikkuhit luohttámuššii, legitimitehtii ja oassálastimii sámi demokratiija hárrái. Sámi báikkálašdemokratiija, bargu sámi politihkain gielddain lea dehálaš vuođđogeađgi sámi demokratiijas. Sámedikki rolla eamiálbmoga sápmelaččaid álbmotválljen orgánan lea maid guovddáš fáddán ja lávdegoddi galgá analyseret Sámedikki rolla juridihkalaš, institušuvnnalaš ja ekonomalaš rámmaid vuođul.

Movt lea gulahallan gaskal gielddaid mat barget ovddidit sámi áššiid ja Sámedikki? Makkár rolla gielddain galggašii leat sámi demokratiijas? Movt sáhttá báikkálaš sámi siviilaservodat leat mielde nannemin sámi demokratiija ja iešmearrideami? Dát leat muhtun gažaldagat maid lávdegoddi háliida digaštallat ja čalmmustahttit.

Čielggadeapmi galgá oažžut áigái konstitutionála dialoga gulahallama sámi ovddasteami birra ja stáhta ja eamiálbmoga gaskavuođa birra dán válgaáigodagas. Sihke siskkáldas dilálašvuođat sámi demokratiijas, sámi báikkálašservodagas ja ovttasdoaibman stáhtain ja eará ásahusaiguin galget čuvgejuvvot. Oppasámi konteaksta galgá leat oassin máhttovuođus.

Lávdegotti jođiha Finn Arne Bieski-Selfors ja eará lahtut leat Helga Pedersen, Martin Rimpi, Kristin Strømsnes ja Torvald Falch. Lávdegoddi galgá čállit njeallje raportta sámi demokratiija birra, mat galget geigejuvvot Sámediggái.

Loga eanet demokratiija lávdegotti birra: Njuovččageahči - Sámedikki demokratiijalávdegoddi