Struktuvra ja mearkkašupmi deaivvadeamis lea Verddevuohta. Verddevuohta lea boares davvisámegiel doaba mii čilge lotnolas sorjavašvuođa, erenoamážit boazosápmelaččaid ja riddoálbmoga gaskkas. Seammás lea verddevuođas sáhka das ahte gávdnat oktasaš čovdosiid, vaikko beroštumit leat iešguđetláganat. Olles Sámis lea árbevierru ahte iešguđetge joavkkut ovttasbarget gaskaneaset leamaš dehálaš oassi birgejumis - birget. Máŋgga sajis lea dáruiduhttin billistan dán ovttasbarggu. 

– Mii háliidat viidásetfievrridit verddevuođa geavaheami, oassin soabadanbarggus. Dás lea sáhka doarjumis ja ovttasbarggus sámi servodagas, ja gaskal sámi ja ii-sámi ásahusaid, organisašuvnnaid ja aktevrraid. Mii sáhttit árvvusatnit nubbi nuppi, dadjá sámediggeráđđi Runar Myrnes Balto. 

Prográmma fáttát galget addit áddejumi historjjá, soabadeami ja verddevuođa gaskavuođas, seammás dat láhčá dili smiehttamii, oahppamii ja ovttasbargui. Ságastallamiid ja vásáhusaid lonohallama bokte ožžot oassálastit vejolašvuođa hukset ođđa oktavuođaid, nannet dálá oktavuođaid ja čohkket reaidduid viidáset soabadanbargui – báikkálaččat ja regionálalaččat sihke sámi ja dáža servodagas. 

Sámediggi háliida čohkket ollu iešguđetlágan aktevrraid, nugo berošteaddji ovttaskas olbmuid, sámi ovttastusaid ja servviid, giellaguovddážiid, museaid ja kulturbargiid, dutkan- ja oahpahussuorggi aktevrraid, ja gielddalaš, fylkkagielddalaš ja nationála dási eiseválddiid. 

Dieđiheapmi lea dál rabas, ja áigemearri dieđihit lea cuoŋománu 15. beaivvi 2025. 

Eanet dieđuid ja liŋka dieđiheapmái gávnnat dáppe: 

https://events.berg-hansen.no/sametingetVerdde2025