– Lea stuorra dárbu árvvoštallat realismma das go leat nu ollu ođđa prošeavttat mat dieđihuvvojit, dadjá Muotka.

Ollugiidda sámi servodagas ja sámi vuoigatvuođalaččaide mielddisbuktá dát hirbmat stuorra eahpesihkarvuođa ja stuorra rahčamušaid proseassaid hámis mat gáibidit hui ollu máŋgga vuoigatvuođalaččain.

– Sámi vuoigatvuođalaččaide, sihke boazodollui, dáloniidda, eará guohtonealáhusaide, meahcásteaddjiide ja mearrasámiide čuhcet hui garrasit buot dát proseassat mat dál fertejit čađahuvvot, ja dat dagahit garra giččuid ja leat hui ressursagáibideaddjit, dadjá Sámedikki presideanta.

Sámediggeráđđi Maja Kristine Jåma dadjá ahte Sámediggi lea máŋgii váldán ovdan dan ahte sámi vuoigatvuođalaččaide ferte láhčit dili nu ahte sii duođas sáhttet searvat mearrádusproseassaide, almmá ahte ráđđehus lea nagodan vástidit.

– Lean fuolastuvvan ahte ollu guovloreguleremiid ja konsešuvdnaohcamiid čuovvoleapmi šaddá hui lossadin sámi servodahkii. Ovdamearkka dihtii lea hástalus gávdnat gelbbolaš bargiid geat sáhttet geahčadit nu ollu prošeavttaid, dadjá Jåma.

Ráđđehus almmuhii doaibmabidjopáhka energiija ja boazodoalu várás ovdal juovllaid. Sámediggi lea kritihkalaš dasa go dat almmuhuvvui almmá ahte Sámediggi lei konsulterejuvvon dahje searvvahuvvon.

– Váilevaš searvadahttin ja čuovvoleapmi lea heittot vuolggasadji go mii ná stuora barggu galgat čađahit. Mii eat oainne ahte ráđđehus lea čoavdán gažaldaga čavgejuvvon čielggadangáibádusaid birra, dadjá Jåma.

Geahča listtu mas leat dieđut plánejuvvon fápmobuvttadeami birra NVE neahttabáikkis