Diehtu doarjjavuostáiváldiide

Diehtu doarjjavuostáiváldiide

Sámediggi ipmirda bures ahte koronavirus čuohcá sámi ealáhusaide ja ásahusaide, ja muđui kultureallimii masa koronavirus váikkuha, ja dohkkeha danne ahte prošeavttat maŋiduvvojit.

- Mii eat gáibit ruovttoluotta doarjaga sis geat ožžot mis fásta doaibmadoarjaga lágidemiide maid eai sáhte čađahit koronavirusa geažil. Dasa gullet bušetterejuvvon golut ráhkkananbargui ja doaimma čađaheapmái, ovdamearkka dihte golut dolliide dahje artisttaide. Buot goluid ferte duođaštit rehketdoalus ja raporttas seamma ládje go dábálaččat, lohká sámediggepresideanta Aili Keskitalo.Deaddil ja stuora govva ihtáAili Keskitalo Kenneth Hætta  

Sámediggi ávžžuha lágideddjiid geain leat šiehtadusat artisttaiguin ja vuolit lágideddjiiguin geahččalit gávdnat čovdosiid mat maiddái sihkkarasttet artisttaid sisabohtosa, nu mo ovdamearkkadihte lágidit konsearttaid eará háve.

- Mii ávžžuhit ásahusaid mat ožžot fásta doaibmadoarjaga Sámedikkis, muhto eai beasa čađahit buot plánejuvvon doaimmaid, geahččalit eará vuogi mielde doaimmahit fágalaš doaimma mii lea heivehuvvon dán ođđa dillái masa mii leat gártan, dadjá sámediggepresideanta.

Sáddes midjiide e-poastta samediggi@samediggi.no ja evttot ođđa gaskaboddosaš beaivemeari prošeavtta gárvvisteapmái. Sámediggi áigu dás ovddasguvlui juohkit dieđuid vejolaš rievdadusaid birra mat gusket doarjjaoažžuide. Mii bivdit buohkaid čuovvut mielde min neahttasiiddus ja Facebook-siiddus oažžun dihte ođđa dieđuid.