2021:s čađahii professor Jon Todal guorahallamiid Norgga beale Sámedikki ovddas bihtánsámegiela ja ubmisámegiela birra, ja son lea čállán čielggadeami dálá gielladiliid birra ja boahtteáiggi doaimmaid birra. Čielggademiin deattuhuvvo ahte Norgga bealde leat sorjavaččat ovttasbargat bihtánsámi ja ubmisámi birrasiiguin Ruoŧa bealde.

Mikkel Eskil Mikkelsen Sámediggi

– Čielggadeamit leat addán buoret vuođu Sámediggái árvvoštallat vejolašvuođaid revitaliseret dáid gielaid. Dat leat maiddái addán obbalaš gova das makkár vejolašvuođat leat bargat viidáseappot gielaid revitaliseren Norggas, dadjá Mikkelsen.

Čielggadeamit čájehit ahte dáid gielaid dilit Norgga bealde leat oalle ovttalágánat. Garra dáruiduhttinpolitihkka lea váikkuhan dasa ahte Norgga bealde eai leat bihtánsámi ja ubmisámi giellageavaheaddjit geain lea leamaš sámegiella ruovttugiellan mánnávuođas. Dáin guovlluin leat goitge olbmot geat fuolkevuođa ja kultuvrralaš čanastagaid bokte identifiserejit iežaset bihtánsámi ja ubmisámi gielain ja kulturárbevieruin. Gielat leat ain anus Ruoŧa bealde ja olbmot Ruoŧa bealde hálddašit bihtánsámi ja ubmisámegiela iešguđetge dásiin. Gielain lea liikká duođalaš dilli ja goappaš gielat leat sakka áitojuvvon gielat.

Sámediggi lea lágidan álbmotčoahkkimiid bihtánsámi ja ubmisámi guovlluin, lokten dihte fuomášumi ja oažžun dihte dieđuid sihke gielladiliin, ja seammás oažžut dieđuid giellabirrasiin sihke Norgga ja Ruoŧa bealde makkár dárbbut ja vuordámušat sis leat revitaliserenbargui. Bođii ovdan ahte lea beroštupmi váldit ruovttoluotta ja seailluhit gielaid.

Sámediggeráđđi vállje ovddidit oktasaš dievasčoahkkinášši bihtánsámi ja ubmisámegiela revitaliserema birra Norggas. Mearrádusárvalus lea guovtti oasis, okta bihtánsámegiela várás ja nubbi ubmisámegiela várás. Sámediggeráđđi evttoha ahte Sámediggi dohkkeha sihke bihtánsámi ja ubmisámegiela sámegiellan Norggas.

– Mii háliidit váikkuhit dasa ahte láhččojuvvo dilli nu ahte sáhttet ráhkaduvvot aktiivvalaš bihtánsámi ja ubmisámi giellabirrasat Norgga bealde, ja maid bargat dan ovdii ahte ásahuvvo rájiidrasttildeaddji ovttasbargu, dadjá Mikkelsen. Sámediggeráđđi árvala dan dihte ráhkadit sierra vuoruhemiid bušehttii revitaliseren ja nannen dihte dáid gielaid.

Sámediggeráđđi árvala maid bargat dan ovdii ahte oažžut dán guokte giela mielde báikenammalága láhkaásahussii, vai eanet bihtánsámi ja ubmisámegiel báikenamat sáhttet registrerejuvvot guovddáš báikenammaregistarii nu ahte dat sáhttet adnot almmolaččat.

Ášši meannuduvvo dievasčoahkkimis njukčamánu 8. beaivvi.

Loga áššebáhpiriid: Ášši 08/23 Bihtánsámegiela ja ubmisámegiela revitaliseren Norggas

Jus áiggut jearahallat dahje jus leat gažaldagat, váldde oktavuođa sámediggeráđiin Mikkel Eskil Mikkelseniin (NSR), tlf. +47 917 42 161, mikkel.eskil.mikkelsen@samediggi.no