Duodji lea kulturguoddi ealáhus mas lea stuorra mearkkašupmi sámegielaide, árbevirolaš máhttui, kultuvrii ja sámi ealáhusovdáneapmái. Sámediggi lea olu jagiid bargan rámmaeavttuid buoridit duojis ealáhussan, ja láhčit eanet ovdáneami ja dietnasa iešguhtege duojárii.
Sámedikki dievasčoahkkin mearridii 2019:s álggahit proseassa ovttas vuođđudusain Duodjeinstituhtain, ja berošteaddjiorganisašuvnnaiguin Duojáriid Ealáhusservviin ja Sámiid Dujiin mas lea áigumuš gávnnahit beaktilis ja vuogas organiserema ealáhussii. Mearrádus lei njuolggo čuovvoleapmi duoji sámediggedieđáhusas mii mearriduvvui 2018:s. Boahtte vahku dievasčoahkkimis galgá Sámediggi buktit ovdan bohtosiid dán diŋgojumis.
– Sámediggi lea gearggus váldit stuorát ovddasvástádusa duoji ovddideamis, sihke ealáhuslaččat ja immateriealla kulturárbin. Gulahallan ja ovttasdoaibman leat čoavddasánit viidáset bargui, dadjá sámediggeráđđi Hans Ole Eira (Gb), ja lasiha ahte lea dárbu sierra ovttasdoaibmanorgánii.
– Duodjeealáhus lea unni, muhto jus Sámediggi aktiivvalaččat doaibmá koordináhtorin ja čállingoddin ovttasdoaibmanorgánas, de mii maid sáhttit váldit stuorát ovddasvástádusa lotnolas diehtojuohkimis ja prošeavttaid ovttastahttimis main lea guovddážis ovdánahttit duoji- ja hábmenfitnodagain fitnodat- ja márkankanálaid, dadjá Eira.
Sámediggi ruhtada Duodjeinstituhta doaimma. Eira dadjá ahte Duodjeinstituhtas lea potensiála ovdánit duoji eahpeávnnaslaš kulturárbbi gelbbolašvuođaguovddážin, danne go lea lunddolaš váldit oktavuođa Duodjeinstituhtain oažžut dieđuid duodjeárbevieruid birra iešguđet sámi guovlluin.
– Sámediggi lea gulahallančoahkkimiin Duodjeinstituhtain dovddahan ahte Sámediggi ieš háliida nammadit vuođđudusa stivrajođiheaddji, dadjá Eira.
Dievasčoahkkinášši guoskkaha maid rámmavuogádaga jahkásaš duodješiehtadallamiin. Duodješiehtadallamiid rámmaráhkadusa álkidahttin sáhttá boahtit iešguhtege duojárii buorrin. Sámediggeráđi mearrádusárvalus lea heaittihit Duodjeealáhusa váldošiehtadusa ja laktit osiid váldošiehtadusas ealáhusšiehtadussii oktasaš dokumeanttas.
– Dáinna lágiin livččii váldošiehtadus eanet fleksibel, erenoamážit go lea sáhka nuppástuhttimiin. Dehálaš mearrádusat váldošiehtadusas sáhttet váldot mielde ealáhusšiehtadussii, dadjá Eira.
Sámedikki dievasčoahkkin meannuda ášši 34/22 Duoji ovttasbargu ja organiseren gaskavahku golggotmánu 12. beaivvi.
Jearahallama addá dahje vástida gažaldagaide sámediggeráđđi Hans Ole Eira (Gb), mob. +47 918 61 471, hans.ole.eira@samediggi.no
Áššebáhpirat