– Mun vuorddán rievttálaš gieđahallama fuomášahttin dihte daid duođalaš áššemeannudanmeattáhusaid mat leat čuožžilan go Energiijadepartemeantta ii leat konsulteren Sámedikkiin ja ii leat čielggadan váikkuhusaid dákkár stuorra doaibmabijus. Danne oaivvilda Sámediggi ahte elektrifiserenmearrádus ii leat lobálaš, dadjá sámediggepresideantta Silje Karine Muotka.  

Sámediggi čuoččuhus lea ahte Hámmárfeastta LNG Muolkkuin huksen, doaibma ja rusttegat rievdaduvvon plánaid dohkkeheapmi eai leat lobálaččat.  

Čuoččuhusa vuođđun lea ahte stáhta lea dahkan áššemeannudanmeattáhus go lea rihkkon konsultašuvdnageatnegasvuođa Sámelága vuođul, ja váikkuhusčielggadeapmi petroleumslága, plána- ja huksenlága ja konsultašuvdnanjuolggadusaid vuođul.  

Dáid láhkamearrádusaid fertejit ipmirduvvot nu ahte leat ovttaládje riikkaidgaskasaš konvenšuvnnaid álgoálbmogiid ja minoritehtaid birra, erenoamážit ILO-konvenšuvnna nr. 167 artihkal 6,7 ja 15, ON konvenšuvnna siviila ja politihkalaš vuoigatvuođa artihkal 27. EU prošeaktadirektiivva galgá maid ollašuvvot.  

– Muolkkuid elektrifiseren buktá stuorra váikkuhusaid sámi kultuvrii, ealáhusdoibmii ja servodateallimii. Dakkár stuorra doaibmabijus mas leat stuorra váikkuhusat sámi luondduvuođustussii, almmá ahte Sámediggi lea konsulterejuvvon ja almmá ahte doaibmabidju lea váikkuhusčielggaduvvon, lea nu duođalaš Sámediggái ahte mii eat leat oaidnán eará vejolašvuođa go oažžut dán rievttálaččat čielggaduvvot, dadjá sámediggepresideantta.  

Wikborg Rein advokáhtafitnodaga Elise Johnsen ovddida ášši Sámedikki ovddas.  

Sámediggepresideanta Silje Karine Muotka čuovvu dikki Osloves.