Sametingspresident Silje Karine Muotka
Åse M. P. Pulk, Sámediggi
– Sámediggeráđđái lea dehálaš ahte lávdegoddi ráhkada láhkaortnega ja geavahusa mii sihkkarastá ahte sámi báikkálašolbmuide leat iežaset árbevirolaš ávkkástallanguovllut olámuttus. Seammás háliida Sámediggeráđđi maiddái áimmahuššat luonddu ja suodjalit luondduguovlluid billisteaddji geavaheami ja huksema vuostá, dadjá sámediggepresideanta Silje Karine Muotka.
Álbmotriekti gáibida ahte álbmotstáhta galgá láhčit dili nu ahte álgoálbmogat sáhttet bisuhit kultuvrraset ja árbevieruideaset. Sápmelaččaide lea luondduriggodagaid geavaheapmi dehálaš oassi eallinvuogis. Jus stáhta eiseválddit lága olis gildet sámiid vejolašvuođa ovdamearkka dihte guolástit, bivdit, čoaggit dahje eará sullasačča bargat iežaset guovlluin, lea maiddái várra ahte stáhta eiseválddit gildet sámiid rievtti doaimmahit kultuvrraset.
Lea buohkaide oahpis ahte Romssa ja Finnmárkku stáhtahálddašeaddji guhkit áiggi lea moaitán sierralohpegeavaheami mas addojuvvo lohpi vuodjit meahcis go doaimmaha árbevirolaš meahcceávkkástallama. Lea maiddái leamaš gažaldat ahte addágo mohtorjohtolatlágas 6. paragráfa láhkavuođu dakkár geavahussii, ja maiddái ahte addágo láhka ollislaččat lobi johtalit mohtorfievrruiguin meahcis maid ákkasta sámi geavahemiin.
– Jus justa odne ii leat vejolaš dákkár johtolat lobiin, de oaivvilda sámediggeráđđi ahte dat lea duođalaš váilevašvuohta otná njuolggadusain. Mohtorjohtolatláhka fertešii rahpat lobi mii addá lobi ja vuođđuda rievtti árbevirolaš meahcceávkkástallamii sámi guovlluin, lohká Muotka.
Sámedikki iežas mohtorjohtolatlávdegoddi árvalii 2019:s ahte § 4 c mohtorjohtolatlágas berre rievdadit nu ahte maiddái sisttisdoallá bivddu, guolásteami, murjema sámi guovlluin Finnmárkkus. Sámediggeráđđi oaivvilda ahte buorre molssaeaktu dasa lea bidjat sisa mearrádusa mohtorjohtolatlága 4. paragráfii mii ráhpá ahte sáhttá mearridit láhkanjuolggadusa sihke Finnmárkui ja Davvi-Romsii, mii addá gielddaide vejolašvuođa addit lobiid johtalit mohtorfievrruiguin meahcis árbevirolaš luondduávkkástallama oktavuođas.
Jus dasa lassin bijašii gáibádusa ahte lobiid johtalit mohtorfievrruiguin dušše sáhttá addit plána vuođul mii lea leamaš almmolaš gulaskuddanproseassas, sihkkarasttášii ahte buot beliide addojuvvo vejolašvuohta váikkuhit mohtorjohtaleapmái, sihke viidodaga ja guhkkodaga dáfus.
– Mii oaivvildit ahte lea dárbu rievdadit otná mohtorjohtolatnjuolggadusaid sihkkarastin dihte báikkálaš árbevirolaš geavaheddjiid rievtti ja vuoruhuvvon ja ávkevuđot lobi johtalit mohtorfievrruiguin árbevirolaš meahcceávkkástallama oktavuođas, loahpaha Muotka.
Ášši meannuduvvo dievasčoahkkimis duorastaga njukčamánu 9. beaivvi. Loga áššebáhpiriid: Ášši 10/23 Sámedikki cealkámuš mohtorjohtolatlágalávdegoddái.
Jus leat jearaldagat dahje áiggut jearahallat, váldde oktavuođa sámediggepresideanttain Silje Karine Muotka, tlf: +47 984 87 576, silje.karine.muotka@samediggi.no