– Lea deaŧalaš ahte skuvllat main leat oahppit geain lea sámegieloahpahus, oahpahit ohppiide sámi árbevirolaš máhtu. Dákkár prošeavttat leat dehálaš lasáhus oahpahussii, dadjá sámediggeráđđi Ann-Elise Finbog (SáB).

Romssa fylkkasuohkan, Heggen joatkkaskuvla, lea ožžon 62 520 ruvnno prošektii Árbevirolaš giđđajohtin bohccuiguin - ceavzilis oahppomátki sámegielain, boazodoaluin ja biebmovieruiguin. Prošeavtta ulbmil lea addit ohppiide praktihkalaš vásáhusa sámi árbevirolaš máhtus go servet bohccuid giđđajohtimii.

Guovdageainnu suohkan, Guovdageainnu skuvla, lea ožžon 100 000 ruvnno prošektii Oahppomátki mearrasámiid guvlui. Prošeavtta ulbmil lea ahte oahppit besset vásihit, oahppat ja oahpásmuvvat mearrasámi guovlluide ja kultuvrii, oahppat mo olbmot leat birgen mearrasámi guovlluin, ja oahppat mearrasámi doahpagiid ja borramušárbevieruid.

Ivgu suohkan, Vuošvákki bajásšaddanguovddáš lea ožžon 35 742 ruvnno prošektii Árbevirolaš sámi máhttu Vuošvákki bajásšaddanguovddážis. Prošeavtta ulbmil lea gaskkustit árbevirolaš sámi máhtu lávu, ullu ja biebmoráhkadeami birra oassin skuvlla oahpahusas.

Návuona suohkan, Návuona mánáid- ja nuoraidskuvla lea ožžon 150 000 ruvnno prošektii Árbevirolaš máhttu ja luondduriggodagaid geavaheapmi. Prošeavtta ulbmil lea nannet ohppiid oktavuođaid, seammás go sii besset oahpásmuvvat dasa movt olbmot ovdal leat eallán ja oahppat iešguđetlágan sámi kulturelemeanttaid birra.

Dán doarjjaortnega ohcanáigemearri lea skábmamánu 3. b. 2026 dii. 15.30. Ohcamušat meannuduvvojit dađistaga.