Doarjagat Giellavahku 2023 lágidemiide

Sámediggeráđđi lea juolludan Giellavahku prošeavttaide doarjagiid 807 282 ruvnno ovddas. 

Mikkel Eskil Mikkelsen Vaino Rensberg, Sámediggi

Giellavahkku 2023 lahkona. 43. vahku, golggotmánu 23. beaivvi rájes 29. beaivvi rádjái, mii fárrolaga oainnusmahttit sámegielaid miehtá riikka. Dán vahku lágiduvvojit doalut ja doaimmat sihke digitálalaččat ja báikkálaččat.

Giellavahkku lea oktasaš áŋgiruššan sámegielaid oainnusmahttima váste, ja lea Suoma, Ruoŧa ja Norgga beale sámedikkiid gaskasaš ovttasbargu. Sámi giellaguovddážat leat olles leavttuin pláneme báikkálaš prográmmaid Giellavahkkui.  

Sámediggeráđđi lea juolludan doarjaga 25 prošektii dán jagi Giellavahku olis, oktiibuot 807 282 ruvnno ovddas.

– Lean hui duhtavaš go nu oallugat leat ohcan doarjaga Giellavahku lágidemiide. Nu somá lea go oallugiin lea beroštupmi lágidit doaluid dán vahku, dadjá sámediggeráđđi Mikkel Eskil Mikkelsen (NSR).

Eanas doarjjaohcamat leat boahtán Finnmárkkus. Ovdamearkka dihte leat Mátta-Várjjaga gielddas boahtán máŋga ohcama. Mátta-Várjjat Kulturskuvla lea okta ohcciin, ja lágida «Språk gjennom duodji», man ulbmil lea nannet sámegiela duddjoma ja náhkkebargguid bokte.

Mearrasiida lágida veaskogoarrunkurssa man Pia Jannok doallá, Stiftelsen Nordland nasjonalparksenter oainnusmahttá Giellavahku nu ahte erenoamážit deattuha luonddusániid ja sániid mat gullet sámi árbevirolaš máhttui oahpaheami. Lullisámi guovllus lea Saemien Sijte ožžon doarjaga lágidit aktivitehtabeaivvi, ja dán prošektii gullá giela oahppan duddjodettiin.

Sámediggeráđđi lea duhtavaš go lágiduvvojit ná ollu iešguđetlágan doaimmat dán jagi Giellavahku olis. Dán jagi Giellavahku almmolaš rahpandoalut leat Ivgobađas, Omasvuona suohkanis, golggotmánu 23. beaivvi.

Čuovo áinnas Giellavahku Facebook-siiddu Giellavahkku / Gïelevåhkoe / Giellavahkko / Samisk språkuke ja Instagram-siiddu giellavahkku. 

Giellavahkus lea sierra neahttasiidu, mas gávdná prográmma, resurssaid ja dieđuid Giellavahku birra. Loga eambbo: giellavahkku.org.

Doarjja lea juolluduvvon dáidda prošeavttaide:

Doarjja lea juolluduvvon dáidda prošeavttaide Sámi giellavahkku 2023
OhcciProšeaktaJuolluduvvon doarjja
Burfjord Sámi Travel – Mikkel Eivind OskalGiella Vahkku 43 - 202340000
Árvu ASDoarjja ráhkadit sámi GIFs40000
Kárášjoga Sámiid SearviGiellaarena sámi giellavahku oktavuođas40000
Helgelándda Sámiid SærviLullisámi gielladoaimmat báikkálašguovllus Grane-Vefsn-Aarbortes40000
Nordland nasjonalparksenter vuođđudusSámi giellavahkku Nordland nasjonalparksenteris40000
Oslo gieldda OahpahusetáhtaSámi giellavahkku vahkku 4340000
Raanen SaemiehMinikursa duojis lullisámegillii, logaldallan lullisámi sohkanamahusain, julevsámegiel mánáidkonsearta ja giellabingo/giellakafea40000
Saemien Sijte vuođđudusGielladoaimmat Saemien gïelevåhkoe oktavuođas40000
Sámi joatkkaskuvllat, Kárášjogas ja GuovdageainnusSámi giellavahkku40000
Deanu gieldaGiellavahkku 202340000
Duodjeinstituhtta vuođđudusKurssat ja workshopat mánáide, nuoraide ja earáide40000
SVD Musea- ja historjásearviLuohteárbevierut ja musihkkabádji nuoraide40000
Romssa ja Finnmárkku fylkkagieldaSámi giellavahkku Álttá joatkkaskuvllas40000
Mátta-Várjjaga gieldaGiella duoji bokte35000
Romssa ja Finnmárkku fylkkagieldaBuđaldettiin sámástit32000
Oslo Sámiid SearviGiellalávgun, juoigankursa ja stoahkan31100
Romssa ja Finnmárkku fylkkagieldaGiellavahkku30000
Omasvuona suohkanGielladoaimmat čalmmustahttin dihte davvisámegiela29400
Mearrasiida vuođđudusSisteveaskko kursa Pia Jannokain29000
Bådåddjo gieldaGielladoaibmabijut26000
Davvebiegga ÁlbmotGiellavahkku 2023 - Doaibmabidjopáhkka turisttaide ja báikkálaš álbmogii25000
Omasvuona suohkanProšeakta Ullu - ovttasbargu gaskal Ivgubađa skuvlla ja Olmmáivákki duodjesearvvi22200
Rein Styrke ASSámegiel teavsttat dárogielat gussiide ja sámegiel sánit bohcco siskilušain15582
Min Árbe – Vår Arv. Sámi kultursearvi Mátta-VárjjagisSeminára - Várjjat-sámegiella ja Várjjat luođit, Sámi giellavahkku12000
Almmuhuvvon 18.10.2023 10.10
Maŋemusat rievdaduvvon 24.10.2024 15.41

Juogadanboalut