Jon-Christer Mudenia
Árvu/Sametinget
Doarjjaortnega mihttomearri lea bisuhit ja lasihit barggolašvuođa mearrasámi guovlluin mariidnaealáhusaid siskkobealde.
Heggelund Fisk AS Vannareidas Gálssa suohkanis oažžu 300 000 ruvnno doarjjan oastit guolástanfatnasa. Dát prošeakta lea dan birra ahte ásahit ceavzilis riddoguolásteami boaittobealguovlluide, dainna ulbmiliin ahte oččodit eanet njuovžilis ja báikkálaččat vuođđuduvvon guolástusealáhusa. Dát áŋgiruššan ii dušše atte ohccái vejolašvuođa bargat ealáhusas, muhto lea maiddái mielde bisuheamen guolásteami boaittobealguovlluin, sihkkarastime báikkálaš bargosajiid ja viidásetfievrrideame riddokultuvrra.
Lerjo Fisk AS Skiervvás oažžu 300 000 ruvnno doarjjan oastit guolástanfatnasa. Fitnodaga ulbmil prošeavttain lea ceavzilis guolásteapmi rittus, ja áimmahuššat dehálaš árbevieruid amas dat eai jávkka. Ohcci oaivvilda ahte lea dehálaš ásahit bargosajiid unnit suohkaniidda, gos leat unnán bargosajit.
Tom Stian Edvardsen AS Ráirrus Álttá suohkanis oažžu 250 000 ruvnno doarjjan oastit guolástanfatnasa. Ohcci háliida álggahit sierra iežas fatnasiin, ja áigu doaimmahit riddoguolásteami unna fatnasiin. Dákkár fatnasiin leat unnán bázahusat, ja adnojuvvojit leat mávssolažžan boaittobealbáikkiide Norggas.
– Sámediggi lea ilus go sáhttá doarjut sin geat háliidit bargagoahtit guolásteaddjin sámi guovlluin. Mii jáhkkit ahte doarjagat leat mielde bisuheamen ja buorideamen barggolašvuođa mearrasámi servodagain, dadjá sámediggeráđđi Jon-Christer Mudenia (NSR).
Sámediggi háliida ahte eambbogat álggášedje guolástusealáhussii, ja danne lea Sámedikkis doarjjaortnet mii galgá movttiidahttit fatnasiid háhkamii.
– Lea hui buorre oaidnit ahte nuorra rávisolbmot háliidit áŋgiruššat guolástusealáhusas, ja dása háliida sámediggeráđđi váikkuhit. Sámediggi ávžžuha eambbogiid geat háliidit oastit iežaset vuosttaš fatnasa ohcat doarjaga mis, dadjá Mudenia.
Sámediggi sáhttá addit doarjaga gitta 35 proseantta dohkkehuvvon gollomeroštallamiin. Stuorámus doarjja lea 250 000 ruvnno adnon fatnasiid oastimii. Ođđa fatnasiid oastima oktavuođas lea stuorámus doarjja 300 000 ruvnno.
Mariidnaealáhusat doarjjaortnegis lea rabas ohcanáigemearri skábmamánu 3. b. 2026 dii. 15.30 rádjai. Ohcamat meannuduvvojit dađistaga.