Gerhardsen Kystfiske AS, Vebjørn Rosvold Gerhardsen bokte, lea Nuortavágis Davvenjárgga gielddas, ja oažžu ge 250 000 ruvnno doarjjan fatnasa oastimii.

Gerhardsen lea dál oahpahalli, muhto háliida álggahit iežas guolásteaddjekarrieara iežas fatnasiin. Guollefanas Max William šaddá Gerhardsena vuosttaš fanas. Guolásteapmi lea álo leamaš su niehku, ja doarjja Sámedikkis sáhttá dán niegu duohtandahkat.

Arktisk Fiske AS, Ådne Søderholm bokte, lea Buođggáin Mátta-Várjjat gielddas, ja oažžu 250 000 ruvnno guollefatnasa háhkamii ja 50 000 ruvnno reaidduid háhkamii.

Guollefanas Riddu lea Søderholma vuosttaš guollefanas. Su mihttu lea ásahit iežas bargosaji riddo-, vuotna- ja mearraguolásteami bokte ja áiggi mielde bálkáhit veahki fatnasii. Dakko bokte ahte doalvut guliid guollevuostáiváldimii Finnmárkkus áigu Arktisk Fiske AS maiddái váikkuhit dasa ahte doalahit bargosajiid guolástusealáhusas gáttis Finnmárkkus.

– Mii leat ilus go sáhttit doarjut dáid investeremiid ja jáhkkit ahte doarjagat váikkuhit dasa ahte bisuhit ja nannet barggaheami mearrasámi servodagain, dadjá sámediggepresideanta Silje Karine Muotka (NSR).

Sihke Nuortaváhki Davvenjárgga gielddas ja Buođggát Mátta-Várjjat gielddas leat ealáhusovddideami doarjjadoaibmaguovllu siskkobealde, mii dahká vejolažžan addit doarjaga fitnodagaide. Doarjagat oktiibuot 550 000 ruvnno ovddas addojit doarjjaortnegis Doarjja vuođđoealáhusaide - Mariidnaealáhusat.

– Sámediggi háliida ahte eambbogat barggašedje guolástusain, ja danne lea mis doarjjaortnet movttiidahttin dihtii oastit fatnasa vai eambbogat álggášedje riddolagaš bivdui, dadjá sámediggepresideanta.