![](/handlers/bv.ashx/ie337bbc7-3f0b-485b-b4ad-e5a42dc29a31/w1200/q10691/kc02a04f06b7f/arvu_samediggi_portett_012-web.jpg)
Guovdageainnu suohkan dat oamasta Ovddos AS, man ovddasvástádus lea hálddašit nuppástuhttinprográmma, mii galgá váikkuhit dasa ahte ráhkaduvvojit ođđa ja bargosajit ja ahte dálá bargosajit sihkkarastojuvvojit, ja galgá maiddái nannet ealáhuseallima nanusvuođa ja váikkuhit dasa ahte innovašuvdnanákca lassána. Nannet lea prošeakta maid Ovddos AS ja Oarje-Finnmárkku orohagat leat bidjan johtui. Prošeakta álggahuvvui jagi 2021, ja mihttun lea ásahit bistevaš ráđđeaddin- ja resursaguovddáža boazodoalus várás, maid boazodoallu oamasta.
Prošeavtta mihttomearri lea ovddidit fysalaš ja digitála gelbbolašvuođa- ja resurssaarena mas orohagaide leat olámuttos ráđđeaddin-, rehketdoalo- ja čállingoddedoaibma, mii lea veahkkin álggahit ja struktureret siskkáldas ovttasdoaibmama, ja nanne gelbbolašvuođa siskkáldasat ealáhusas ja olgguldasat ealáhusa birra, dainna ulbmiliin ahte nannet boazodoalu Guovdageainnus.
Sámediggepresideanta Silje Karine Muotka lea ilus go sáhttá leat mielde doarjumin prošeavtta.
– Dát lea hirbmat deaŧalaš prošeakta boazodollui. Prošeakta čuovvu Sámedikki vuoruhemiid boazodoalu ođđahutkama ja ovddideami ektui. Mun sávan ahte doarjja Sámedikkis sáhttá leat mielde veahkeheamen prošeavtta oadjebasat ollašuhttit áigumušaidis, dadjá sámediggepresideanta.
500 000 ruvdnosaš doarjja addojuvvo Boazodoallu doarjjaortnega bokte, man ulbmil lea sihkkarastit ja nannet árbevirolaš bearašvuđot boazodoalu, lasihit dietnasa ja unnidit massimiid boraspiriid geažil.