Dát prošeakta lea ovttasbargu Duottar Studio AS ja NRK Sámi gaskka. Dáinna buvttadusain áigu Duottar Studio AS leat mielde hukseme gelbbolašvuođa dubbemis mas earenoamážit lea fokus julevsámi giellaguvlui, muhto mii maiddái fátmmasta davvisámegiela. Sii áigot ovddidit ja nannet dubbengelbbolašvuođa julevsámegillii neavttáriid ja teknihkalaš bargiid gaskkas, ja leat mielde das ahte alla kvalitehta mánáid-tv sámegielaide lassána.
![](/handlers/bv.ashx/i30f3dd29-77bb-46d7-9025-6a4cdad876da/w1200/q10720/k790758f7e911/mikkel-eskil-mikkelsen.jpg)
Sámediggeráđđi Mikkel Eskil Mikkelsen lea ilus go sámediggeráđđi sáhttá doarjut dán.
– Lea stuorra dárbu sámi filmmaide ja filbmaráidduide mánáide ja nuoraide miehtá Sámi, ja lea dehálaš ahte mánát ja nuorat besset oaidnit sámi filmmaid ja ráidduid sámegillii. Leat unnán mánáid-tv ráiddut dubbejuvvon julevsámegillii, nu ahte lea dárbu čađahit dákkár gelbbolašvuođaloktema, maiddái go jurddašit boahtteáiggi julevsámi prošeavttaid birra.
Mikkelsen dadjá ahte filmmat mánáide ja nuoraide leat deaŧalaš giellagaskkusteaddjit, ja danne dat leat deaŧalaččat mánáid giellaovdáneapmái.
– Sámi mánáin galgá leat vejolašvuohta geahččat TV-prográmmaid iežaset eatnigillii. Sámediggi oaidná danne dehálažžan ahte dubbenprošeavttat ožžot doarjaga, go dat leat dehálaš gielladoaibmabijut mat nannejit sihke sámegiela sajádaga servodagas ja mánáid giellageavaheami, muhto maiddái dahket sámegiela ealli giellan mii čuovvu servodatovdáneami.
220 000 ruvdnosaš doarjja addojuvvo doarjjaortnegis Sámi gielladoaibmabijut lulli-, ubmi-, bihtán-, julev-, nuortalaš- ja márkosámi guovlluin.