Verddeguovddáš galgá gaskkustit boazodoalu ja mearraguovllu historjjá, vieruid, giela ja árbevieruid. Mihttojoavkun leat sihke dáluássit ja boazosápmelaččat, skuvlaoahppit sihke vuođđu-ha joatkkaskuvlla dásis, ja lassin maid almmolaš bargit ja ealáhusat. Guovddážis lea maid mihttun olahit sihke riikadási ja gaskariikkalaš mihttojoavkkuid, nu mo turisttaid, dutkiid ja eará fágaolbmot.

Sámediggepresideanta  Silje Karine Muotka (NSR) lea hui duhtavaš go Sámediggi sáhttá doarjut dákkár ásaheami Návuonas.

– Lea dehálaš doarjut dakkár doaimmaid mat nannet diehtojuohkimiin fálaldagaid ja čalmmustahttit dárbbu ja ávkki verddestallamis gaskkal  boazosápmelaččaid ja mearraguovllu ássiid, dadjá Muotka. 

Son sávvá ahte prošeavttain nagodit bidjat buori vuođu guovddáža ásahemiin,  ja ahte dát šattašii fálaldahkan turisttaide, gávnnadanbáikin, fágaguovddážiin ja diehtojuohkinguovddážiin historjjá birra. Dáinna ođđa guovddážiin sáhttet maid buorebut čalmmustahttit čanastagaid luondduávkkástallamiid,  ja mat leat oktasaš beroštumit, sihke mearraássiide ja boazosápmelaččaide.

Doarjja juolluduvvo regionálaovdánahttinprošeaktan ja lea oassin vuoruhemiin. Dán doarjjasuorggis de vuoruhuvvojit prošeavttat mat gusket sámegiela, kultuvrra, servodateallimii ja leat oassin ovttasbargošiehtadusain gaskkal Sámedikki ja fylkkasuohkaniid ja gávpotsuohkaniid.