Kyst og Fjord Frakt AS Stiertnás, Álttá suohkanis, lea ožžon 180 000 ruvnno doarjjan viiddidit sin dálá govdunkáija. Fitnodat fievrrida gálvvuid meara bokte Oarje-Finnmárkkus.  

– Lea buorre oaidnit ahte mii sáhttit leat mielde doarjumin ealáhuseallima Sámis. Sámi guovllus lea juohke áidna prošeakta dehálaš resursa. Sámedikki mielas lea guolásteapmi Álttávuonas dehálaš, ja lea oassi min kulturvuođu hálddašeamis. Dat mearkkaša ollu ássamii, árvohahkamii ja maiddái mearrasámi kultuvrii boahtteáiggis, dadjá sámediggepresideanta Silje Karine Muotka (NSR).  

Fitnodat háliida viiddidit sin dálá káija govdunkáijain, vai lea sadji sin fatnasiidda. Fitnodat háliida maiddái láiggohit fanassajiid earáide guolástusealáhusas.  

– Mii háliidit leat mielde nannemin guolásteaddji logu earret eará dainna lágiin ahte sihkkarastit eanet dorski riddofatnasiidda ja ahte rusttegat káijas ja gáttis sáhttet leat mielde buorideamen diliid guolásteaddji mearragáttis ja vuonain, lohká sámediggepresideanta Muotka.  

Juolludus addojuvvo Sámedikki juohkelágan ealáhusaid doarjjaortnega bokte.