Samibooking AS háliida álgit fállat dálveturismavásáhusaid, main guossit ožžot čiekŋalis áddejumi sámi kultuvrra ja árbevirolaš boazodoalu birra. Sii háliidit fállat gussiide mátkki ealu lusa, fitnat guođohanbarttain ja idjadeami lávus.

– Sámi mátkeealáhus lea deaŧalaš arena sámi identitehta nannemii ja min kultuvrra oainnusmahttimii. Dákkár fálaldagat sáhttet leat mielde loktemin máhtu ja áddejumi sámi servodagas, dadjá sámediggepresideantta Silje Karine Muotka (NSR).

Doarjja juolluduvvo doarjjaortnega Sámi mátkeealáhusat, hutkás ealáhusat ja sámi biebmu bokte.