Doarjjaortnega Dearvvašvuođa-, fuolahus ja mánáidsuodjalusprošeavttat mihttomearri lea buorre dearvvašvuohta ja ovttaárvosaš dearvvašvuođa, fuolahus - ja mánáidsuodjalusbálvalusat sámi álbmogii. 

Nannejit dearvvašvuođabálvalusaid ja máhtu  

Dearvvašvuođas, fuolaheamis ja mánáidsuodjalusas lea addojuvvon doarjja deaivvadanbáikkiide sámi vuorasolbmuide sihke Deanus ja Álttás, sámi muitoteama ásaheami várás Kárášjoga gielddas, sámi dearvvašvuođafierpmádaga/ dearvvašvuođateama ásaheapmái Oslos, ja deaivvadeapmái nuoraide geat leat biebmoruovttuin Finnmárkkus.

– Sámi deaivvadansajit leat deaŧalaš arenat sámegiela, sámi árbevieruid, historjjá, duoji ja luođi gaskkusteapmái árgabeaivvis. Dat leat eastadeaddji dearvvašvuhtii, identitehtii ja eallinkvalitehtii. Erenoamážit sámiide geat orrot sámi guovddášguovlluid olggobealde leat dákkár deaivvadansajit dehálaččat. Sii vásihit dávjá ahte lea unnit vejolašvuohta geavahit giela, ahte lea heajut gullevašvuohta sámevuhtii ja oaidnemeahttunvuođa árgabeaivvis, dadjá sámediggeráđđi Ann-Elise Finbog (SáB).

Lea maiddái juolluduvvon doarjja prošektii Sammen om bedre helse - Reindrift og SANKS. Mihttomearrin lea ovddidit ovttasbarggu boazodolliid ja SÁNAG/Sámi klinihka gaskka prošeaktaplánema ja ekspeartajoavkku ásaheami birra, mii galgá leat mielde oččodeame bálvalusfálaldaga mii lea buorebut heivehuvvon boazodoalu dárbbuide.

Vuođđudus Protect Sápmi oažžu doarjaga prošektii Eksistensiell samisk helse - Del 2. Prošeakta galgá ovdánahttit ja valideret reaiddu mii galgá mihtidit ja analyseret eksistensiála dearvvašvuođa sámi konteavsttas, mii galgá leat ávkin sihke boazodollui ja mearridanproseassaide Sámis.

Dasa lassin lea addojuvvon doarjja viidáseappot ovddidit e-oahppanportála eSanks SÁNAG/Sámi Klinihkas, mii galgá leat mielde buorideame sámi pasieanttaid dearvvašvuođa- ja fuolahusbálvalusaid kvalitehta.

Ovttasbargu riikarájáid rastá 

Interreg doarjjaortnega ulbmilin lea nannet ovttasbarggu rájáid rastá Sámis. Dán rádjai dán jagi lea juolluduvvon okta doarjja dán ortnega bokte, prošektii mii maiddái oažžu doarjaga dearvvašvuođa-, fuolahus- ja mánáidsuodjaluspoastta bokte.

Mánáid-, nuoraid- ja bearašdirektoráhtta oažžu oktiibuot 550 000 ruvnno - 350 000 ruvnno Dearvvašvuođa-, fuolahus- ja mánáidsuodjalanprošeavttaid doarjjaortnegis ja 200 000 ruvnno Interreg doarjjaortnegis - prošektii Fierbmi - Bridging Sámi Children and Families' Services Across Borders.

Prošeakta galgá dahkat álkibun fállat sosiála bálvalusaid rastá ráji sámi mánáide ja bearrašiidda Suoma ja Norgga davviguovlluin. Galgá ásahuvvot fágafierpmádat, addot doarjja bargiide rádjerasttildeaddji áššiin ja juhkkojuvvot dieđut sosiálabálvalusvuogádaga birra ránnjáriikkas. Prošeavtta boađus galgá leat giehtagirji das movt dákkár áššiid galgá gieđahallat.

– Rádjerasttideaddji bálvalusat leat dehálaččat ja dárbbašlaččat. Norggas ja Suomas leat iešguđetlágan lágat ja vuogádagat, ja dat dahká ovttasbarggu váttisin, ja sáhttá dagahit ahte mánát eai oaččo dásseárvosaš bálvalusaid. Bearrašat sáhttet maiddái šaddat goabbat riikii ovdamearkka dihte earráneami dihte. Lea maid váttis gávdnat biebmoruovttuid rájáid rastá, ja bargiin váilu máhttu ránnjáriikka vuogádagaid birra, dadjá Finbog. 

Ohcanáigemearri

Goappaš doarjjaortnegiid ohcanáigemearri lea skábmamánu 3. b. 2026 dii. 15.30. Ohcamat meannuduvvojit dađistaga.

Listu juolludemiin dearvvašvuođa-, fuolahus- ja mánáidsuodjalusprošeavttaide:

Juolludeapmi Interreg-prošektii