Maja Kristine Jåma Árvu/Sametinget

Langhuset Lotre galgá šaddat viessu mas lea fatnasa hápmi. Viessu lea mearrasámi inspirerejuvvon ja galgá čalmmustahttit mearrasámi historjjá. Galgá buvttaduvvot dokumentárafilbma Langhuset Lotre huksemis, mii galgá movttiidahttit olbmuid oahppat eanet mearrasámi kulturhistorjjá ja huksendáidaga birra.

Mihttu lea gaskkustit árbevierrogiehtabarggu ja fágalaš gelbbolašvuođa, ja inspireret dasa ahte duostat álggahit ja čađahit prošeavtta. Mihttojoavku lea earret eará báikkálaš álbmot, dáiddárat olles máilmmis, turisttat ja skuvllat.

– Lean ilus go Sámediggi sáhttá leat mielde doarjume prošeavtta mas lea stuora mearkkašupmi mearrasámi huksen- ja giehtabargoárbevieruide. Dát lea mielde lokteme mearrasámi kultuvrra, ja boahtá áiggi mielde addit sihke mátkkálaččaide ja báikkálaš álbmogii buriid vásáhusaid, dadjá sámediggeráđđi Maja Kristine Jåma (NSR).

Jåma jáhkká ahte prošeavttas lea mearkkašupmi sámi kultuvrii Hámmerfeastta guovllus, ja ahte dat boahtá váikkuhit positiivvalaččat sámi kultuvrra gaskkusteapmái ja diehtojuohkimii boahtteáiggis.

100 000 ruvdnosaš juolludeapmi addo doarjjaortnegis Doarjja kulturdoaimmaide, ja lea prošeakta mii goziha árbedieđuid ja ávnnaskeahtes kulturárbbi.

Prošeavtta čađaheaba vuolggaheaddjit Eva ja Knut Bjørnar Arnesen ovttas iFinnmarkain, Pro Barentsiin ja Hámmerfeastta suohkaniin.

Sámediggeráđđi Maja Kristine Jåma (NSR) addá jearahallama ja vástida gažaldagaide, mob. +47 472 42 366, maja.kristine.jama@samediggi.no