Sámediggi lea gieskat juolludan doarjagiid oktiibuot 338 500 ruvnno ovddas doaibmabijuide ja prošeavttaide mat leat mielde dokumenteremin boraspirevahágiid vuođđoealáhusain, sihke eanandoalus ja boazodoalus.

– Čájehuvvo ahte boazodoallu lea oaidnán ávkki ođđaáigásaš rusttegiin nugo dronain ja termalaš giikaniin ja kámerain go galgá eastadit ja duođaštit vahágiid, dadjá sámediggeráđđi Berit Marie P. E. Eira (JSL).

Eanadoalus ja boazodoalus leat stuorra hástalusat boraspiriid geažil, ja leat garra gáibádusat go galget duođaštit ahte boraspiret goddet guohtunelliid. Ealáhusaide lea hui váttis oažžut duohta vahágiid duođaštuvvot, go ráppit jávket jođánit luonddus. Drona ja termalaš giikana vehkiin sáhttá boazoeaiggát jođáneappot gávdnat ráppiid boraspiriid observerema bokte, duođaštit vejolaš ráppiid ja oažžut dohkkehuvvot vahágiid. Dát fas sáhttá mielddisbuktit beaktileappot boraspirehálddašeami. Jođánis čielggadeapmi boraspirevahágiid birra guohtunguovlluin sáhttá maiddái eastadit vahágiid, go guođoheaddjit sáhttet bidjat johtui doaibmabijuid mat eastadit ahte eanet bohccot goddojuvvojit.

Eira lea hui ilus go Sámedikkis leat doarjjaortnegat main boazodoallit ja boanddat sáhttet ohcat veahki eastadit boraspirevahágiid, ja mat leat mielde duođašteamen vahágiid.

– Dat mielddisbuktá eanet buvttadeami ja buoret ekonomiija. Dasa lassin leat mii dorjon guođoheami doaibmabidjun eastadit boraspirevahágiid dainna lágiin ahte juolludit doarjaga oastit mobiila guođohanbarttaid nugo gumppi ja diligeanssa. Mun sávan ahte ollugat atnet buorrin dan ohcanvuđot ortnega mii mis lea Sámedikkis ja ahte dat geahpedivččii ealáhusa árgabeaivválaš hástalusaid, dadjá Eira.

Listu prošeavttain mat leat ožžon doarjaga: