Doarjja duodjedoaimma álggaheapmáiSámediggeráđđi lea juolludan 200 000 ruvnno duodjedoaimma Arctic Design Studio Labba ásaheapmái, man ulbmilin lea ásahit ollesáiggedoaimma. Johanna Labba álggahii Arctic Design Studio Labba jagis 2021. Dan rájes lea fitnodat leamaš astoáiggedoaibma. Dál áigu fitnodaga eaiggát viiddidit doaimma ja ásahit ollesáiggefitnodaga mas lea ollislaš buvttadeapmi, ja nu ásahit alcces bargosaji. Dan oktavuođas dárbbaša buvttadanrusttegiid ja heivvolaš lanjaid. Fitnodat háliida maiddái buvttadit ođđa buktagiid ja bargat buoridit vuovdima.– Sámediggi lea bidjan ollu návccaid duodjedoaimmaid ásaheapmái, ja mii oaidnit ahte ollislaš áŋgiruššan duodjesuorggis lea leamaš ávkkálaš. Sámedikkis leat mii hui duhtavaččat go duojárat oidnet vejolašvuođaid lasihit iežaset buvttadeami ja dietnasa, ja ásahit bargosajiid, dadjá sámediggeráđđi Berit Marie P. E. Eira (JSL).200 000 ruvdnosaš doarjja lea juolluduvvon doarjjaortnegis Duodji: Investeremat, ovdánahttindoaimmat, konsuleantaveahkki, álggahandoarjja ja prošeavttat, mas doarjjaortnega mihttomearri lea buoridit duodjefitnodagaid ámmátlašvuođa ja dietnasa. Almmuhuvvon 15.08.2024 09.41 Maŋemusat rievdaduvvon 15.08.2024 10.35