Duodjeinstituhta ossodagat Aarportes, Romssas ja Guovdageainnus áigot geavahit ruđaid oastit goarrunmašiinnaid ja eará dárbbašlaš reaidduid. Dát galget leat olámuttus buohkaide geat geavahit bargobájiid, leš dal oahpahusas dahje buvttadeamis. Dákkár heiveheapmi addá sihke álggaheddjiide ja hárjánan duojáriidda vejolašvuođa bargat dujiiguin ámmátlaš dásis, maiddái vaikko ruovttus váilot resurssat.

– Go nanne duoji, de nanne min kulturárbbi maid. Mii sávvat ahte dát doarjja láhčá dili nu ahte sihke ođđa ja hárjánan duojáriin, lea vejolašvuohta duddjot reaidduiguin maid sii dárbbašit ovdánahttit iežaset máhtu duojis, dadjá sámediggeráđđi Elisabeth Erke (Gb).

Doarjja juolluduvvo doarjjaortnega Investeremat, ovdánahttindoaimmat, konsuleantaveahkki, álggahandoarjja ja prošeavttaid bokte.