Sámediggi lea juolludan doarjaga guovtti sámi searvái. Porsáŋggu sámiid searvi oažžu doarjaga lágidit goarrunkursa goarrut ládjogahpira, ja Helgelaanten Duedtie oažžu doarjaga lágidit náhkkegoarrunkurssa ja buvttadit oanehisfilmma náhkkedikšunproseassas.  

– Duohtavuođa- ja seanadankommišuvdna lea duođaštan ahte oasit kultuvrralaš vuođus leat máŋgga sajis jávkan. Danne lea mearrideaddji ahte mii gáhttet ja gaskkustit min árbevirolaš duoji boahttevaš buolvvaide, erenoamážit dakkár báikkiin gos dáruiduhttin lea leamaš garas ja dagahan ahte duodjeárbevierut leat jávkan. Dákkár kurssaid bokte mii sihkkarastit ahte duodjemáhtut, fievrriduvvojit viidáseappot ja bisuhuvvojit. Dát lea dehálaš oassi min kulturárbbis ja identitehtas, lohká sámediggeráđđi Elisabeth Erke (Gb). 

Doarjja juolluduvvo Gelbbolašvuohta, oahpahus ja kursa doarjjaortnega bokte.