Doarjja duodjevissui Mázes

Doarjja duodjevissui Mázes

Sámediggeráđđi lea juolludan doarjaga Berit Miennai ásahit duodjeossodaga Mázii.  

Berit Mienna fitnodat lea dál Unjárgga gieldda, gos son buvttada ullokartaŋggaid, gápmagiidda ja skuovaide siskkosvuođuid suoinnis, beassis ja ullus. Otná buvttadanvisti lea unni, ja son áigu dál ásahit sierra duodjeviesu Mázii gos buvttada dujiidis. Máze lea Berit Mienna ruovttubáiki, ja son áigu ain buvttadit dujiid duhppejuvvon ullus. Sámediggeráđđi lea juolludan 356 000 ruvnno doarjaga fitnodahkii hukset duodjeviesu.

Duoji ealáhusšiehtadusas Sámedikki 2020 bušeahtas lea várrejuvvon 1,5 miljuvnna ohcanvuđot doarjjan investeremiidda, ovddidandoaibmabijuide, konsuleantaveahkkái, álggahandoibmii ja prošeavttaide.

 Sámediggeráđđi doarju duodjefitnodagaid ásaheami, ja mii sávvat ođđa ásahussii buresboahtima Mázii. Bargosajit leat hui dehálaččat Máze ovdáneapmái, ja gilis leat guhkit áiggi leamaš hástalusat go olbmot fárrejit eret Mázes, dadjá sámediggeráđđi Hans Ole Eira (Gb).

Doarjja lea juolluduvvon Duoji ealáhusšiehtadusa ohcanvuđot doarjjaortnegis Investeren- ja ovddidandoarjja, konsuleantaveahki, álggahandoarjja ja prošeavttat.

Jearahallama addá dahje vástida gažaldagaide sámediggeráđđi Hans Ole Eira (Gb) +47 918 61 471 hans.ole.eira@samediggi.no