Hanne-Lena Wilks oažžu 500 000 ruvnno doarjjan prošektii “Hukset dállohuksehusa buvttadeami ja gaskkusteami várás”.

Ulbmil prošeavttas lea suodjalit, viidáseappot fievrridit ja gaskkustit sámi árbevieruid bearašealáhusa bokte mas erenoamážit nissonolbmot, boazodoallu ja duojit leat guovddážis. Galgá ásahuvvot buvttadanlatnja oktan gullevaš bájiin sámi giehtaduodjái ja dállogávpái.

– Dát lea deaŧalaš doaibmabidju mii ovttastahttá árbedieđu ođđaáigásaš ealáhusovddidemiin. Prošeakta veahkeha nannet sámi kultuvrra, háhkat bargosajiid ja addit sihke báikkálaš olbmuide ja turisttaide autenttalaš gova sámi eallimis ja árbevieruin, dadjá sámediggepresideantta Silje Karine Muotka (NSR).

Prošeavtta bokte galgá maid láhččojuvvot vejolašvuohta váldit vuostá duodjefidnoohppiid.