Duottar Studio lea ožžon doarjaga dubbet animašuvdnafilmma Jungle Bunch davvisámegillii. Sámegillii oažžu nama Juŋgelveahka - Birra máilmmi ja galgá vuosttaš geardde čájehuvvot kinos álbmotbeaivvi, guovvamánu 6. beaivvi.
Duottar Studio lea maŋimus jagiid dubben máŋga filmma davvisámegillii ja lea hui bures lihkostuvvan. Jietnaneavttárat geaid geavahit leat sihke hárjánan ja muhtin muddui hárjánkeahttá, muhto leat ovddit prošeavttain čájehan ahte sii hálddašit dán bures. Dán filbmii leat buot jienat mearriduvvon ja leat máŋga "oahpes olbmo" ovddeš bures menestuvvan filmmain, ja maid muhtun ođđa karakterat. Filbma lea mánáid- ja bearašfilbma mii heive buoremusat boarráset mánáide go lea ollu mii dáhpáhuvvá ja sisttisdoallá gelddolašvuođa ja humora.
- Gávdnojit unnán bearašfilmmat sámi mánáide ja digitála máilmmis gos lea stuora gilvu mánáide fuomášumis, lea deaŧalaš ahte leat nu ollu animašuvdnafilmmat go vejolaš mat leat bures dubbejuvvon sámegielaide, dadjá sámediggeráđđi Maja Kristine Jåma (NSR).
150 000 ruvdnosaš doarjja addojuvvo ohcanvuđot ortnega bokte Kulturdoaimmat.