Mikkel Eskil MikkelsenDavvi Girji AS Kárášjogas áigu ráhkadit pedagogalaš ávdnasiid mánáidgárddiide mat galget ovdánahttit ja bisuhit mánáid sámi giela ja movttiidahttit mánáidgárdemánáid geavahit sámegiela árgabeaivvis. Ávdnasat galget ráhkaduvvot sihke lulli-, julev- ja davvisámegillii.

– Go sámi mánáid lohku mánáidgárddiin lassána, de lea dehálaš ahte mii čuovvolit dán doarjagiin sámi pedagogalaš ávdnasiidda mánáidgárddiide, dadjá sámediggeráđđi Mikkel Eskil Mikkelsen (NSR).

Doarjja galgá earret eará geavahuvvot ráhkadit guokte spealu, giellabussiid ja lávlladoasa. Spealut leat heivehuvvon dan gávcci iešguđet jagiáigái, ja dáiguin galgá mánáid giellamáhttu ovdánit. Giellabussiin galget leat sihke konkrehtat, hoahkamat ja doahpagat mat leat heivehuvvon iešguđet jagiáigái. Lávlladoassa sisttisdoallá sihke luođi ja lávlagiid jagiáiggiid mielde, ja galgá movttiidahttit mánáid oahppat ja ovdánahttit giela.

– Háliidan sávvat lihku bargui, ja vuorddán iluin oaidnit gárvves pedagogalaš ávdnasiid, dadjá Mikkelsen.

Sámediggeráđđi juolluda 1 540 000 ruvdnosaš doarjaga doarjjaortnegis Doarjja ovdánahttit pedagogalaš ávdnasiid mánáidgárddiide. Doarjjaortnega mihttomearri lea ahte mánáidgárddiide, mánáidgárdeoahpaheddjiide ja oahpahusásahusaide galgá leat álki fidnet pedagogalaš ávdnasiid main lea sámi sisdoallu sámegielaide.

Jearahallama addá sámediggeráđđi Mikkel Eskil Mikkelsen (NSR), tel. +47 917 42 161, mikkel.eskil.mikkelsen@samediggi.no