NA Technologies AS lea ráhkadan appa mii fállá sámegiel oahpahusa máŋgga dásis. Appas ráhkaduvvo virtuealla sámegielat arena gos gielat praktiserejuvvojit guovttebealat ovttasbarggu bokte. Appa gávdno dál Norggas čuovvovaš guđa sámi variánttas: lullisámegiella-dárogiella, davvisámegiella-dárogiella, julevsámegiella-dárogiella, nuortalašgiella-dárogiella, bihtánsámegiella-dárogiella ja davvisámegiella-lullisámegiella.

Nannen dihte oktavuođa ja ipmárdusa sámi guovlluin lea ovddiduvvon sávaldat ahte galggašii maid ráhkaduvvot lullisámegiella-davvisámegiella veršuvdna. Dat dagašii vejolažžan dáid sámegielaid hubmiide oahppat giela njuolga nubbi nuppis, nu ahte ii dárbbaš dárogiela bokte oahppat. Appa ulbmiljoavku leat buohkat badjel 13 jagi geat háliidit oahppat julevsámegiela-davvisámegiela nubbi nuppis.

Sámediggeráđđi lea dál addán doarjaga New Amigos julevsámegiella-davvisámegiella appii.

– Mánáin ja nuorain lea dárbu geavahit sámi gielaid astoáiggis. New Amigos App lea digitála deaivvadanbáiki mii lea dehálaš sosiála, kultuvrralaš ja sámegielat aktivitehta movttiidahttimii, dadjá sámediggeráđđi Mikkel Eskil Mikkelsen (NSR)

Danne go New Amigos iešalddis lea somás speallu, de áigot maid deattuhit olahit sin geat dál eai obage árvvoštala oahpahallat eará sámi giela. Appa galgá olahit dáid joavkkuid, nannet sin motivašuvnna hupmat sámegiela, ja nannet sámi identitehtadovddu.

Appa galgá gárvvis 2024 ođđajagimánus, ja galgá leat olámuttos App Stores ja Google Playas.

300 000 ruvdnosaš doarjja addo doarjjaortnega Doarjja giellaovddidandoaimmaide bokte.

Jearahallama addá sámediggeráđđi Mikkel Eskil Mikkelsen (NSR), tel. +47 917 42 161, mikkel.eskil.mikkelsen@samediggi.no