Girji lea sámi biebmoráhkadanbagadus ja deattuha movt iešguđet ládje sáhttá ávkkástallat olles bohcco. 

Dasa lassin dokumentere girji biebmokultuvrra immateriála kulturárbbi, ovdamearkka dihte ahte manne mii dahkat nu go dahkat biebmobeavddis, go lávus málestit, movt ja manne lea dehálaš doallat lávu čorgadin ja manne gáfeloahpa leikestit dollagáddái.

Biebmoráhkadanbagadusat leat Buljo iežas vásáhusaid vuođul goahkkan ja boazodoallin. Girječálli lea áiggi badjel ovddidan bagadusaid, ja girjjis leat sihke árbevirolaš ja ođasmahtton bagadusat mat leat dálááigái heivehuvvon. 

– Sámi biebmoárbevierut leat dehálaš oassi min kulturárbbis ja dán girjji lea dehálaš oažžut olámuddui sihke sámi servodahkii, ja maiddái viidát earáide, dadjá sámediggeráđđi Maja Kristine Jåma (NSR). Son muitala maid ahte Buljo lea juo dovddus oassálastit sihke internationála ja nationála goahkkamáilmmis, ja son ii deattut dušše gohkkema, muhto maiddái sámi biebmokultuvrra ja árbevieruid gaskkusteami.

Girji čállojuvvo davvisámegillii ja eŋgelasgillii olahan dihtii stuorát márkanii go dušše Sápmái.

Sámediggi lea álggahan prošeavtta nannen dihtii barggu álgoálbmogiid biebmovuogádagaiguin. Bargu lea dan oktavuođas go ON biebmo- ja eanadoalloorganisašuvdna (FAO) lea álggahan koališuvnna álgoálbmogiid biebmovuogádagaide ja Sámediggi lea juo mielde dan stivrenjoavkkus. Sámediggi lea ovdadutkama bokte ožžon bajilgova girjjálašvuođas, publikašuvnnain ja prošeavttain mat gávdnojit Árktisa biebmovuogádagaid birra, ja galgá kártet deháleamos sámi biebmovuogádagaid.

– Máret Rávdna Buljo girji lea hirbmat ávkkálaš dán bargui, ja lea dehálaš ja mávssolaš sámi servodahkii ja maiddái riikkaidgaskasaš oktavuođain. Dat lea dehálaš dan bargui mii guoská min immateriála kulturárbái, loahpaha Jåma.

Doarjja lea juolluduvvon ortnega bokte Prošeaktadoarjja sámi girjjálašvuhtii.