– Lea movttiidahtti oaidnit ahte smávva ja stuorra doaluiguin čájehuvvo sámi kultureallima govdodat ja girjáivuohta. Mun lean ilus go Sámediggi sáhttá leat mielde loktemin min kultuvrra, ja doarjjaortnegiid bokte addit buori sámi dáidda- ja kulturvásáhusaid álbmogii, dadjá sámediggeráđđi Maja Kristine Jåma (NSR). 

Čuovvovaš prošeavttaide lea juolluduvvon doarjja Sámedikki luohte- ja sámi musihkkaortnega ja kulturdoaibmabijuortnega bokte: 

• Buvttadanfitnodat Rieban Music From Sápmi AS lea ožžon 175.000 ruvnnu almmuhit skearru nuorra juigiiguin geat juiget árbevirolaš luđiid. Maŋimuš golbma jagi lea buvttadanfitnodat bargan olu árbevirolaš luđiiguin ja váikkuhan ovdánahttit ja čalmmustahttit nuorra juigiid. 
• Rein Film Finnmark AS lea ožžon 100.000 ruvnnu filbmabuvttadeapmái "Duhášteaddjit - Burning the water". "Duhášteaddjit - Burning the water" lea áigeguovdilis filbma mii čalmmustahttá politihkalaš fáttáid nu mo sámi árbevirolaš bivddu hálddašeami. 
• Komafest AS ja Tromsø World Festival AS leat ožžon 70.000 ruvdnosaš doarjaga gokčat sámi kulturbargiid ja artisttaid mátkegoluid ja bálkkáid. Sámi kulturdoaimmat ledje oassin "Crossings 2023" festivála loahpaheamis ja sámi artisttat ledje maid oassin dán jagáš Tromsø World Festival doaluin. 
• Láhpoluobbala gilisearvi lea ožžon 25.000 ruvnnu doarjaga lágidit kulturbeaivvi gilážis, man fáddán lei Duotavuođa- ja seanadankommišuvnna raporta.  
• Mieron Gilisearvi lea ožžon 20.000 ruvnnu doarjaga Mieron biepmu ja kulturfestiválii, mii lágiduvvui čakčamánu 8. - 10. b. 2023. Searvvis leat 150 miellahtu ja sin doaluid ulbmil lea ovddidit oktavuođaid ja ássanmovtta gilis. Borramuš ja kulturfestivála lágiduvvo ovttas International Center for Reindeer Husbandry (ICR) ja Duodjeinstituhtain. Festivála čalmmustahttá árbevirolaš sámi borramuša, luođi ja duoji. 
• Gáivuonakoara lea ožžon 10.000 ruvnnu koara 50-jagi ávvudeapmái. Koara lea riggudahttán Gáivuona servodaga badjel 50 jagi lávluniluin ja ovddidan báikkálaš servodaga ja dahkan dan dovddusin sámi, kveana ja dáru lávlagiid bokte. Koara šattai erenoamáš dovddusin Liv Rundberg jođihanáiggis. Koaras leat sihke nuorra ja vuorraset oasseváldit. 
• Romssa Girkolaš akademiijai lea juolluduvvon 25.000 ruvnnu konseartta várás Romssa riikkaidgaskasaš girkofestivála 2023 oktavuođas. "Nine Variations on Good Thoughts" lea diŋgojuvvon ja ráhkaduvvon girkofestiválii, ja man Georg Buljo lea čállán. Georg Buljo ja jazz-saksofonista Tore Brunborg čuojaheaba ovttas Romssa duopmogirkus sotnabeaivvi skábmamánu 5. beaivvi.