Solum forlag lea ožžon 206 650 ruvnno mánáidkrimgirjji jorgaleapmái davvisámegillii, Jørn Lier Horsta girjji Operasjon tordensky. Dát girji lea oassi girjeráiddus Detektivbyrå nr. 2, ja lea čállon mánáide 8 jagi rájes. Dát leat bivnnuhis girjjit mat vuvdojuvvojit miljovnnaid mielde. 

- Krim lea šáŋŋer mii lea hui bivnnut historjjáid gelddolašvuođa geažil. Lea gelddolaš go mii dál oažžut jorgaluvvot juoidá Horst krimmáilmmis davvisámegillii, dadjá Jåma.

Nubbi juolludus manná julevsámi lágádussii Tjihkkom Almmudahka, mii lea ožžon 132 500 ruvnno jorgalit Knut Hamsuna girjji Pan julevsámegillii. Lágádus lea máŋggaid jagiid jorgalahttán sihke girjjálašvuođa klassihkkáriid ja populáragirjjálašvuođa julevsámegillii.

– Tjihkkom Almmudahka lea lágádus man mihttu lea lasihit julevsámi girjjálašvuođa. Girjelágádus lea dán háve válljen Hamsuna klassihkkára, guhte lea mávssolaš girječálli lohkat julevsámegillii maid.

Doarjagat oktiibuot 339 150 ruvnno ovddas addojuvvojit doarjjaortnegis Doarjja sámi girjjálašvuođa prošeaktadoarjagii, mas lea rabas ohcanáigi juovlamánu 1. beaivvi rádjai. Doarjjaortnega ulbmil lea sámi girjjálašvuohta mii lea olámuttus sámegillii.