Sámi lágádus Bárus SA Guovdageainnus oažžu gitta 222 250 ruvnno doarjjan nuppi girjji almmuheapmái Mikká ja Áile-ráiddus. Jens Martin Mienna lea girječálli.

Girji heive mánáide 3-7 jagiin ja lea čállojuvvon davvisámegillii. Girjjis lea álkis giella ja oanehis cealkagat, nu ahte lea vejolaš maiddái unnimusaide čuovvut historjjá. Girji lea interaktiivvalaš ja mielddisbuktá ahte mánát galget beassat leat mielde muitalusas go dan lohket. Mánát šaddet searvat eanet aktiivvalaččat muitalussii dan sadjái go dušše čohkkát ja guldalit.

Harald G. Sunde Girkonjárggas oažžu gitta 200 120 ruvnno sámi girjealmmuheapmái. Son pláne jagiid 2025/26 almmuhit Lars Stærk girjji Samiske sagn fra Kirkenes njealji gillii; davvisámegillii, dárogillii, eaŋgalasgillii ja duiskagillii.

Girji lea almmuhuvvon sámegillii 1984:s namain Muitalusat ja máidnasat Mátta-Várjjagis. Dát girji lea áigá juo vuvdon ja ii leat šat gávdnamis. Girji ilmmai dárogillii 1994:s; Eventyr og sagn fra Sør-Varanger. Dan geažil go internationála turisma Mátta-Várjjagii dađistaga lassána ja go dađistaga eambbosat beroštit sámevuođas sihke sisriikkalaččat ja olgoriikkain, de oaivvilda ohcci ahte lea áigi almmuhit girjji ođđasit - dán háve máŋgga gillii, ráidun. Čieža buoremus máidnasa ovddit almmuhemiin leat válljejuvvon ja girjjit galget illustrerejuvvot John Savio grafihkain ja Ellisif Wessela govaiguin.

Tjihkkom Almmudahka Ájluovttas oažžu gitta 157 778 ruvnno jorgalit Arto Paasilinna girjji Harens år julevsámegillii. Arto Paasilinna lea dovddus olles Eurohpás, ja su girjjit leat ovdalaččas jorgaluvvon badjel 40 gillii. Harens år lea bivnnuhis girji humoristtalaš fáttáin ja dat galgá geasuhit nuoraid ja rávisolbmuid lohkat.

Tjihkkom almmudahka lea máŋga jagi jorgalan girjjiid eará gielain julevsámegillii. Lágádus geahččala nu bures go vejolaš válljet dakkár girjjiid mat leat gelddolaččat ja máŋggabealálaččat, lassin dasa ahte jorgalit máŋgga ulbmiljovkui.

– Maŋemus juolludeamit čájehit girjjálašvuođa girjáivuođa ja čájehit ahte min doarjjaortnet olaha viidát. Dás mii doarjut sihke interaktiivvalaš mánáidgirjji davvisámegillii, ođđa girjji almmustahttima mas leat máidnasat ja muitalusat mat gávdnojit eanet gielaide, ja somás ja dovddus romána jorgaleami julevsámegillii. Fargga ožžot buot ahkásaš lohkkit juoidá ođđasa girjehildui, ja vel máŋgga sámegillii. Dat lea illudahtti, dadjá sámediggeráđđi Maja Kristine Jåma (NSR).