Leonardsen film Guovdageainnus oažžu 48 900 ruvnno prošektii Indigenous Arthouse Cinema / investerenruđaid filbmabuvttadanfitnodahkii Guovdageidnui. Leonardsen Film áigu háhkat eanet ja ođđasit teknihkalaš rusttegiid vai beassá searvat sámi buvttademiide ja prošeavttaide, ja vai sus sáhttá leat aktiiva rolla sámi filbmabuvttadeamis mii lea sturron ja leavvá našuvnnalaččat ja riikkaidgaskasaččat.

Fitnodat berošta erenoamáš jienain sámi filbmasuorggi siskkobealde, bargá prošeavttaiguin mat ohcet ođđa geainnuid, ja guorahallá dan mii gohčoduvvo Arthouse filmmat (dáiddafilmmat), mii lea vuohki ráhkadit filbmamuitalusaid mat hástalit ja geahččaladdet filbmakonvenšuvnnaiguin ja šáŋŋeriiguin.

− Dát lea investeren mii nanne dietnasa ja lea dárbbašlaš vai šaddá eanet gánnáhahtti, dadjá sámediggepresideanta Silje Karine Muotka (NSR).

Nubbi prošeakta mii oažžu doarjaga sámediggeráđis, lea Ailo Productions AS Troandimis, mii oažžu 36 000 ruvnno julevsámi mediasisdollui buohkaide.

Ailo Productions AS háliida ráhkadit lávddi masa sámi nuorat ja musihkkaberošteaddjit sáhttet mannat oahppat musihka birra, gullat julevsámegiela, guoimmuhuvvot ja leat oassin searvevuođas - musihka bokte. Dan čađaheapmái dárbbašuvvojit rusttegat nugo videokamera oktii dasa gulli rusttegiiguin, mikrofovnnat ja čuovggat.

Ailo Productions AS sávvá dán prošeavtta váikkuhussan šaddat stuorát rabasvuohta gaskal musihkkasuorggi Sámis ja álbmoga, ja maiddái ahte son sáhttá movttiidahttit ođđa, nuorra taleanttaid čuovvut iežaset nieguid.

− Doaibmabijut gaskkustit ja movttiidahttit julevsámi musihka ja kultuvrra leat positiivvalaččat. Sápmi dárbbaša sisdoalu mii speadjalastá hutkás birrasa Sámis, dadjá sámediggepresideanta.

Doarjagat oktiibuot 84.900 ruvnno ovddas juolluduvvojit doarjjaortnegis Sámi mátkeealáhusat, hutkásealáhusat ja sámi biebmu.